«Ասում է՝ ճանապարհի եզրերին ոչ մի հատ խանութ չկա, ոչ մի ռեստորան չկա, էս չկա, էն չկա»,- Տավուշի մարզի Կիրանց գյուղում վարչապետի տոնով ու ձեւով կրկնում են նրա ասած բառերն ու մեկնաբանում, թե ի՞նչ էր դրանով փորձում հասկացնել Նիկոլ Փաշինյանը:
Խոսքը ԱԺ-կառավարություն հարցուպատասխանի ժամանակ վարչապետի արած հայտարարության մասին է, թե Կիրանցից մինչեւ Բաղանիս միջպետական ճանապարհի վրա ինչի՞ «ոչ մի հատ խանութ չկա, ռեստորան, հյուրատուն չկա, դա ունի մի բացատրություն»:
Կիրանցի բնակիչներից մեկը մեկնաբանեց. «Նա նկատի ուներ, որ Կիրանցից մինչեւ Բաղանիս տարածքում, որտեղ ադրբեջանական հող է ու էդ ընթացքում Կադաստրից ոչ մի անգամ թուղթ չեն տվել, որ էնտեղ մի խանութ կամ ինչ-որ մի շինություն անեն, նա էդ նկատի ուներ»:
Կարդացեք նաև
Ոսկեպարում ի պատասխան վարչապետի՝ տարբեր համեմատություններ էին անում, թե Երեւանի որ փողոցում խանութ կամ ռեստորան չկա, առաջարկում մի բացատրություն էլ դրա համար գտնել:
Ոսկեպարի բնակիչներից մեկն արձագանքեց. «Ես գիտեմ ինչ բացատրություն է, այսինքն ինչի՞ չկա, ուրեմն էդ մեր հողերը չեն, իրա մտքով էդ է անցնում: Բայց ամեն ինչ էլ կա: Մեր գյուղից ներքեւ ունենք խանութ, հենց սահմանի վրա էլ»:
Մեկ այլ բնակիչ բացատրեց, թե գյուղացին փող չունի, որ խանութ ու ռեստորան բացի, ոչ էլ կարող է օգտվել. «Սահմանի վրա ապրող ժողովուրդ են, ի վիճակի չեն, փող չունեն խանութ դնեն: Կիրանցը փոքր գյուղ է, 70-80 տուն, ո՞նց կարային խանութ կամ ինչ-որ ռեստորան դնեին»:
Նշենք, որ վարչապետի հարցի պատասխանը տվել է կառավարությունը: ՀՀ կառավարության 29.12.2005թ 2404-Ն որոշման համաձայն, արգելվում է միջպետական նշանակության ընդհանուր օգտագործման պետական ավտոմոբիլային ճանապարհներից մինչեւ 18 մետր հեռավորությամբ կառուցապատում իրականացնելը:
Հռիփսիմե ՋԵԲԵՋՅԱՆ
