Մոնիտորինգը ցույց է տալիս, որ հանձնունքների տեսքով ՔԿՀ-ներ են մտնում ոչ թե անհրաժեշտ սնունդ կամ պարագաներ, այլ ճոխ սնունդ․ այս մասին այսօր ԱԺ պետաիրավական հարցերի հանձնաժողովի նիստում հայտարարեց ՀՀ արդարադատության նախարար Գրիգոր Մինասյանը՝ պատասխանելով «Հայաստան» խմբակցության պատգամավոր Գեղամ Նազարյանի հարցին։
Գրիգոր Մինասյանը տեղեկացրեց նաեւ, որ քայլեր են ձեռնարկվում ՔԿՀ-ներում սնունդը բարելավվելու եւ «հանձնունքների» պրակտիկան ընդհանրապես վերացնելու՝ հասնելով ԵՄ-ի սահմանած չափանիշներին։ Իրենք արդեն պատրաստ են դա կիրառել, բայց մտածում են աստիճանական անցում կատարել, քանի որ մարդիկ տարիներով սովոր են նման պրակտիկայի։
Պատգամավորը նաեւ նկատել էր, որ շատ մարդիկ, բայցի այն մարդկանցից, ովքեր քաղաքական համատեքստում են կալանավորված եւ նրանց մասին բոլորը գիտեն, դատավարական գործընթացում գտնվում են կալանքի տակ՝ սպասելով գործընթացի ավարտին եւ վճռին։ Հաճախ դա տեւում է տարիներ։
Կարդացեք նաև
Գրիգոր Մինասյանը տեղեկացրեց, որ 866 պրոբացիայի սարքավորում է կիրառվում, որից մոտ 500-ը տնային կալանք է․ սա նախարարը որակում է իրավապահների լավ աշխատանքի արդյունք։ Մոտ 1200 մարդ դեռ կալանքի մեջ է։
«Այսօր մեծ պայքար է մղվում՝ արտոնյալների խավը ՔԿՀ-ներից վերացնելու համար։ Մտնում ենք ՔԿՀ, պարզվում է բազկաթոռներ կան որոշ խցերում, ո՞նց չհանենք։ Հարց է առաջանում, թե ո՞նց է հայտնվել, դա արդեն ուրիշ հարց է»,- ասաց Գրիգոր Մինասյանը։
Այլ մանրամասները՝ տեսանյութում
Նելլի ԳՐԻԳՈՐՅԱՆ
Գլխավոր լուսանկարը՝ «Սեւան» ՔԿՀ-ից
