«Ես մամուլի այդ հրապարակումներին չեմ հավատում։ Որոշ դատավորներ արդեն ասել են, թե ինչու են դուրս եկել աշխատանքից։ Որոշ դատավորներ անցել են ավելի բարձր վարձատրվող աշխատանքի։ Այսինքն՝ դուրս գալով աշխատանքից, կարծեմ (Սերգեյ) Մարաբյանը, գնացել եւ դարձել էր առաջատար իրավաբանական ընկերության փաստաբան։ Նորմալ գործընթաց է»,-այս մասին այսօր կառավարության նիստից հետո լրագրողների հետ ճեպազրույցում ասաց արդարադատության նախարար Գրիգոր Մինասյանը՝ պատասխանելով հարցին՝ մտահոգիչ չէ՞, որ մեկ օրում չորս դատավոր աշխատանքից դուրս է գալիս, ըստ մամուլի՝ ինչ-որ գրագրության, մեկնաբանության, սոցիալական ցանցում «լայք» դնելու համար։
«Մի կողմից՝ եթե պրոֆեսիոնալներ են գնում համակարգից եւ հնարավորություն չստեղծվի այլ մասնագետներին մուտք գործել համակարգ, կարելի էր տխրել։ Բայց ի ուրախություն ինձ՝ մեր քաղաքականության շնորհիվ է, որ հսկայական ռեֆորմների արդյունքում իսկական պրոֆեսիոնալները կարողանում են քննությունների միջոցով մտնել համակարգ։ Սա նաեւ առողջացման նշան է, որ դատավորն ուզում է դառնալ փաստաբան։ Հակառակ կողմից իրենք տեսնում են, որ փաստաբանությունը լավ իրավաբանություն է, որը դատարանում ողջունվում է»։
Հարցին՝ երբ ստեղծվեց այսպես ասած՝ «կալանքի դատարանը», պարզվեց, որ դատավորները տասնյակ միլիոնների աշխատավարձ են ստացել, եւ հետագայում աշխատանք չեն կատարել, քանի որ հետո որոշում կայացվեց, որ այդ դատարանները պետք չեն, արդյոք դա պետական միջոցների վատնում չէ՞, նախարարը պատասխանեց՝ իրականությունն այլ է․ «Ստեղծվել էր դատական համակարգում ենթաբաժին, որը պետք է զբաղվեր զուտ շատ նեղ ֆունկցիայով եւ մեր շատ հարգարժան դատավորները երկար ժամանակ այդ նույն պրոցեսի մեջ գտնվելով՝ ավելի ու ավելի էին ուզում գնալ ընդհանուր իրավասության ընդդատության դատարան, որտեղ ավելի մասնագիտական եւ բազմակողմանի վեճեր էին քննվում։ Դա էր պատճառը, որ որոշում կայացվեց այդ դատավորների որոշ մասին, նաեւ նրանցից մի մասը ռեզերվային ցուցակում են եւ բոլոր նրանք ստանում են աշխատավարձ՝ ըստ օրենքի պահանջի։ ԲԴԽ-ի եւ որոշ դատավորների հետ քննարկման արդյունքում պայմանավորվել են, որ մարզերում կարող են ֆունկցիա իրականացնել։ Ոչ ոք օրենքը շրջանցելով աշխատավարձ չի ստանում»։
Նելլի ԲԱԲԱՅԱՆ