«99 cent only» խանութների ցանցը, որը Ամերիկայում հայտնի է որպես ամենացածր գներ ունեցող ցանցը և գործում է շուրջ 42 տարի, Կալիֆոռնիայի, Արիզոնայի, Նևադայի և Տեխասի նահանգներում կփակվի: Այս մասին հայտարարել են ցանցի սեփականատերերը:
Լուրը տխրեցրել է շատ ամերիկացիների, որոնք անհրաժեշտ ապրանքներ ձեռք էին բերում խիստ ցածր գներով: Այստեղ վաճառվում էին կենցաղային ապրանքներ, հագուստ, ծաղիկներ, անգամ սնունդ մարդկանց և կենդանիների համար: Խանութի հիմնական հաճախորդները ցածր եկամուտ ունեցող քաղաքացիներն էին:
Ապրիլի 5-ից սկսած` ցանցի խանութների բոլոր ապրանքները էլ ավելի զեղչվել են, ինչի հետևանքով մեծ հերթեր են առաջացել: Այս օրերին արդեն խանութների ցուցասրահներում դատարկություն է, ինչպես ասում են` «սրբած-տարած»:
Կարդացեք նաև
Խանութի վերջնական փակումը տեղի կունենա հունիսի 3-ին: Խանութի սեփականատերը ցանցի փակման պատճառ նշել է ֆինանսական դժվարությունները, որոնք, ըստ նրա պայմանավորված են COVID-19-ով, գնաճով ու պահանջարկի փոփոխությամբ:
«99 cent only»-ի սեփականատերն արդեն հայտարարել է սնանկության դիմելու մասին` նշելով, որ ընկերության ակտիվների և պարտավորությունների չափը կազմում է մինչև 10 միլիարդ դոլար:
Ցանցի փակմամբ աշխատանքը կկորցնեն 371 մասնաճյուղերի 14 հազար աշխատակիցներ:
ԼՈւՍԻՆԵ Բուդաղյան
Aravot.am-ի համար
