Քննարկվում է վարչապետի թեկնածուի հարցը, տարբեր անուններ են քննարկվում խորհրդարանական երկու ուժերի հետ։ Այս մասին Հանրապետության հրապարակում լրագրողների հետ զրույցում ասաց «Տավուշը հանուն հայրենիքի» շարժման առաջնորդ՝ Հայ Առաքելական Եկեղեցու Տավուշի թեմի առաջնորդ Բագրատ արքեպիսկոպոս Գալստանյանը։
«Մեր գործը մինչեւ հիմա չի եղել քաղաքական գործընթաց, հիմա, մեր կարծիքով, պետք է որ քաղաքական գործիչների խորհրդակցության արդյունքում արդեն ծրագրեր լինեն։ Երեկ փորձեցինք խորհրդարանական պատգամավորներին հանդիպել, խոսել իրենց հետ, թե ինչ ձեւերով կգնան գործընթացները։ Իրենք պատրաստ են այս գործընթացը շարունակելու եւ օրինական ճանապարհով փորձելու հասցնել ավարտին։ Այդ ժամանակ պահանջվելու է վարչապետի թեկնածու, այդ ժամանակ էլ երեւի կհնչի»,- ասաց նա։
Հարցին՝ որեւէ անուն քննարկվո՞ւմ է, նա պատասխանեց․ «Անուններ բնականաբար քննարկվում են, տարբեր անուններ են քննարկվում, ձեր սիրած ու չսիրած անուններն են քննարկվում, բայց ի վերջո համաձայնություն կգոյանա, թե ով կլինի, ում անձի շուրջ կգոյանա։ Սա արդեն կարծես երկրորդ փուլը լինի, հիմա մենք ժողովրդին արթնացնելու գործընթացի մեջ ենք։ Այսօր, վաղը, մյուս օրը գործնական քայլերի օրերն են»:
Ըստ Սրբազանի՝ վարչապետի որեւէ թեկնածուի շուրջ դեռեւս համաձայնություն չկա․ «Խորհրդարանական խմբակցություններ իրենք արդեն կքննարկեն, որոշակի խորհրդակցություն կլինի, ամբողջ քաղաքական դաշտը ինձ թվում է միախորհուրդ կլինեն այդ անձի շուրջ, եւ կհռչակվի՝ ով է»։ Հարցին՝ ո՞ր քաղաքական ուժերի թեկնածուների անուններ են քննարկվում, նա պատասխանեց․ «Հնարավոր է՝ քաղաքական ուժերից չլինեն»։
Կարդացեք նաև
Հարցին, թե բացառո՞ւմ է, որ Ռոբերտ Քոչարյանի թեկնածությունը կքննարկվի, Բագրատ Սրբազանը պատասխանեց. «Բացառում եմ չէ, այդպիսի հարց չկա հրապարակում, մարդիկ ստեղծեցին այդ միֆը: Ես երկրորդ նախագաhին կյանքում մեկ անգամ եմ հանդիպել՝ 2001-ին Սեւանի թերակղզում, երբ Վեհափառի հետ այցելել եմ Վազգենյան դպրոց, ընդամենը 5 րոպե: Ես որեւէ մեկի հետ եթե հանդիպում ունենամ, թաքցնելու բան չունեմ»:
Անդրադառնալով իշխանության ներկայացուցիչների տարածած տեղեկություններին՝ Բագրատ Սրբազանն ասաց. «Այս մարդիկ ստախոս են, ես երեկ գնացել էի ոտքերս վիրակապելու, ասում էին՝ գնացել է Ռոբերտ Քոչարյանի հետ հանդիպելու։ Ես ոչ երկրորդ նախագահի հետ խոսել եմ, ոչ քննարկել եմ, ոչ էլ իրեն սատարող ուժերի հետ»։
Հարցին՝ իսկ Արման Թաթոյանի անունը քննարկվո՞ւմ է, նա ասաց. «Հնարավոր է, ամեն ինչ հնարավոր է, մարդիկ իմ անունն էլ են քննարկում»:
Ռոզա ՀՈՎՀԱՆՆԻՍՅԱՆ
Լուսանկարը՝ արխիվային
Իսկ ինչու՞ չկա․․․
ինչ է Քոչարյանը քեզանից վա՞տ տղա է․․․
Էդ ինչու՞ եք Քոչարյանի անունը լսելիս խաչակնքվում ու կիլոմետրերով հեռու փախնում։
Չկա՝ դու էլ դի՛ր,
բա հայ մա՞րդ չէ, բա արժանի՞ չէ վարչապետության,
թե՞ էս պահին դա ես ասու, վաղը հակառակը կանես
ինչպես որ տեղ-տեղ քայլելով ինտերվյու էիր տալիս,
թե հրաժարականի հարց չկա,
բայց հենց իմիջմեյքըրներդ հռոմի Պապի հագուստն հագցրեցին՝
կառավարությանը 1 ժամ ժամանակ տվեցիր։
Հիմա սուտասան ո՞վ է, հոպար։
Ժողովուրդը հիասթափված է այնքան, որ էլ ոչ մեկի ասածին հավատ չի ընծայում իսկ ինչ վերաբերվում է Բագրատ սրբազանին վարչապետի թեկնածու առաջադրելուն կասեմ, որ ինքը հոգևոր առաջնորդ լինելով լավ էլ այդ առաքելությունը կատարում է, պետք չէ որ ներքաշվի այլ գործի մեջ, հենց ինքն էլ խոստովանում է, որ ինքը հոգևոր առաջնորդի կատարած գործը ավելի բարձր է դասում ,քան թե լինի վարչապետի պաշտոնում, ուստի լավ կանի չընդգրկվի թեկնածուի ցուցակում, այլ շարունակի իր սրբազան գործը։