Գյումրիի Պռոշյան փողոցում գտնվող հայ խորհրդային կուսակցական և պետական գործիչ, Ժողկոմխորհի նախագահ Սարգիս Լուկաշինի (Սրապիոնյանի) արձանը, որը տեղական նշանակության հուշարձան է, դեռ օգոստոսին անհայտ անձի կողմից տեղաշարժվել էր։ Արձանը վերցրել ու տեղադրել էին 10 մետր հեռավորության վրա, բարեբախտաբար չէին վնասել։
ՀՀ ԿԳՄՍ նախարարության պատմամշակութային և մշակույթի հուշարձանների պաշտպանության վարչության համակարգման բաժնի ավագ մասնագետներից մեկը դիմելով էր ոստիկանություն՝ ոստիկանության ծառայողների միջնորդությամբ հուշարձանը իր նախկին տեղում տեղադրելու խնդրանքով։
Ոստիկանության աշխատակիցները պարզել էին, որ արձանի ապամոնտաժումը կատարել է Էջմիածին քաղաքի բնակիչ՝ Է․Ս-ն, որը «Սախկալյան և ընկերներ» ՍՊԸ տնօրենն է։
Նա ոստիկանությանը տված իր բացատրության մեջ հայտնել է, որ շուրջբոլորը կատարված շինարարական աշխատանքների և բեռնատար ավտոմեքենաների անցուդարձի հետևանքով արձանը կիսով չափ կողաշրջվել էր, արձանի նախկին տեղում էլ՝ գետնի տակ, առկա է եղել դիտահոր, ինչի համար Լուկաշինի արձանը վերամբարձ կռունկով տեղափոխվել է մոտ 15 մետր այն կողմ։
Կարդացեք նաև
Նա նաև նշել է, որ այս ամենը կատարելիս՝ չի ունեցել համապատասխան թույլտվություն, հետևաբար և Գյումրիի համայնքապետարանի կողմից ենթարկվել է վարչական պատասխանատվության։
Սեպտեմբերի 4-ին ՀՈԲ տեսուչներից մեկը ներկայացրել է հանցագործության մասին ՀՀ քր. օր. 301 հոդվածով նախատեսված հաղորդում՝ քրեական վարույթ նախաձեռնելու հարցը քննարկելու համար:
Կազմված փաստաթղթերն ուղարկվել են Շիրակի մարզային քննչական վարչություն:
