«Կարմիր խաչի միջազգային կոմիտեն փետրվար ամսին տեսակցել է հայերին, որոնք պահվում են Ադրբեջանում։ Ռուբեն Վարդանյանի տեսակցությունը եղել է իր հացադուլի ժամանակ։ Միեւնույն ժամանակ, տեսակցության շրջանակներում եղել է նաեւ մեր մյուս պատվիրակը, որը բժիշկ է։ Տվյալ տեսակցության շրջանակներում եղել է բժշկական անձնակազմ, որը ապահովել է հացադուլի մեջ գտնվող անձի չեզոք զննությունը»,- այսօր լրագրողների հետ զրույցում ասաց Կարմիր խաչի միջազգային կոմիտեի հաղորդակցման ծրագրերի ղեկավար Զառա Ամատունին։
Նա նշեց, որ իրենց արձանագրած մանրամասները չեն կիսում հանրության ու Բաքվի բանտերում գտնվող անձանց ընտանիքների, ինչպես նաեւ ՀՀ իշխանությունների հետ։
Հարցին, թե ԿԽՄԿ ներկայացուցիչներն արձանագրե՞լ են Ռուբեն Վարդանյանի խոշտանգման փաստը, Զառա Ամատունին պատասխանեց․ «Ցանկացած նկատառումներ, որոնք արվում են մեր տեսակցությունների ընթացքում կատարվում են անմիջապես մեր տեսածի հիման վրա։ Մենք ունենում ենք առանձնազրույցներ անձի հետ, ունենում ենք հնարավորություն ոչ միայն տեսակցելու, այլ նաեւ պտտվել ազատազրկման վայրով։ Ինչ վերաբերում է մեր կողմից տեսած եւ արձանագրած հարցերին, բնականաբար, արձանագրվում է ցանկացած բան, որը մենք տեսնում ենք։ Այդ տեսածը ամփոփվում եւ քննարկվում է իշխանությունների հետ, որոնք պատասխանատու են այս անձանց համար։ Ես չեմ կարող այս պահին մեկնաբանել ձեր ասածը»։
Նշենք, որ «Մենք ենք մեր սարերը» զարգացման գործակալությունն ու «Արցախ Միություն» ՀԿ-ներն այսօր բողոքի ցույց էին կազմակերպել Կարմիր խաչի միջազգային կոմիտեի երևանյան գրասենյակի մոտ՝ պահանջելով փրկել Ռուբեն Վարդանյանի կյանքը եւ պաշտպանել Բաքվի բանտերում պահվող հայ գերիներին։ ՀԿ-ները ստորագրել են բաց նամակ՝ ուղղված ԿԽՄԿ նախագահ Միրյանա Սպոլյարիչ Էգերին:
Կարդացեք նաև
Ռոզա ՀՈՎՀԱՆՆԻՍՅԱՆ
