Քիչ առաջ ֆինանսական զեղծարարություններից տուժած քաղաքացիները հասան մարդու իրավունքների պաշտպանի (ՄԻՊ) գրասենյակ: Գրասենյակից քաղաքացիներին հանդիպում առաջարկեցին 15 քաղաքացու մասնակցությամբ ու առանց լրատվամիջոցների ներկայության, ինչին քաղաքացիները համաձայնություն տվեցին:
-ՄԻՊ-ի տիրույթում է համակարգել քաղաքացիների ու Կենտրոնական բանկի (ԿԲ) միջեւ եղած իրավահարաբերությունները: Այս բողոքով ենք եկել ՄԻՊ գրասենյակ: Ենթադրելի է, որ իրենք ուզելու են գրավոր փաստաթուղթ, որի շրջանակում գործեն: Գրավոր փաստաթուղթ ներկայացնելուց չենք կաշկանդվում, կարող ենք ձեռագիր էլ քաղաքացիների անունից գրել ու մուտք անել: Համապատասխան պաշտոնյան թող լսի ու պատասխանի մեր հարցերին,- ասաց տուժած քաղաքացիների իրավունքների պաշտպանությամբ զբաղվող Մհեր Կարագյոզյանը:
Հետո կոչ արեց քաղաքացիներին ներս մտնել գրասենյակ. «Համ անձրեւ է գալիս, համ մեր շենքն է, ինչ կլինի որ, եկեք ներս մտնենք»:
Կարդացեք նաև
Ցուցարարները չհասցրին ներս մտնել, դուրս եկավ ՄԻՊ խորհրդականը եւ առաջարկեց հանդիպում՝ 15 ցուցարարի մասնակցությամբ եւ առանց լրատվամիջոցների ներկայության:
Մհեր Կարագյոզյանն էլ ասաց լրագրողներին, որ հանդիպման ժամանակ հարցնելու է՝ ինչու մինչեւ հիմա չի եղել արձագանք իրենց խնդրին ու արդյոք պարտադիր է, որ քաղաքացիները դիմեն ՄԻՊ-ին, որ համակարգվեն քաղաքացի-պետական մարմին իրավահարաբերությունները:
Հիշեցնենք, որ ապրիլի 30-ին տուժած քաղաքացիները կրկին Կենտրոնական բանկի դիմաց ցույցի էին դուրս եկել, այդ օրը, ինչպես այսօր, նույնպես Կենտրոնական բանկից ոչ մեկը նրանց չլսեց, հուսադրող ոչինչ չասաց:
Արփինե ՍԻՄՈՆՅԱՆ
