Լրահոս
Օրվա լրահոսը

2-րդ բանակային կորպուսի զորամասի թիկունքի պետը՝ նոր կահավորված հենակետում հրդեհի բռնկման, թշնամու հնարավոր դիվերսիոն գործողության մասին

Օգոստոս 08,2025 17:02 Share
Աջակցեք aravot.am-ին

Այսօր Գեղարքունիքի մարզի Սեւանի նստավայրում Ազատ գյուղի զինվորական կացարանում բռնկված հրդեհի ու դրա հետեւանքով 15 զինվորի մահվան դեպքի քննության գործով հարցաքննվեց  երկրորդ բանակային կորպուսի զորամասի թիկունքի նախկին պետ Շիրազ Խաչատրյանը:

Նա պատմեց, որ դեպքի վայրում օգնել է դիակների դուրս բերման աշխատանքներում, մի զինվորի տեսել է մահճակալի վրա պառկած, մյուսին դեմքի վրա ընկած: Այս վկան աշխատանքից ազատվել է  իր զեկուցագրի հիման վրա՝ դեպքի հենց հաջորդ օրը: Ասաց՝ այդպես է նպատակահարմար գտել:

Անդրադառնալով կացարանում հակահրդեհային միջոցներին՝ վկան ասաց՝ այդ միջոցներից նկատել է ուրալների դիմաց, երկու հատ փոքր օգտագործած հակահրդեհային միջոց էլ մի կողմում էր գցած:

Նրա խոսքով՝ բանակային կորպուսի կողմից հատկացվել են հակահրդեհային անվտանգային միջոցներ ըստ պահանջարկի, վստահեցրեց, որ հատկացումները հաստատող մեծ քանակությամբ փաստաթղթեր էլ կան:

Տուժողների ներկայացուցիչ Նորիկ Նորիկյանը նրան հարց ուղղեց՝ եղե՞լ է իրավիճակ, որ դեպքի վայր գնալուց հետը տանի կրակմարիչներ, տպավորություն ստեղծելու համար, որ կացարանում բավարար քանակությամբ կրակմարիչներ են եղել: Ի պատասխան՝ վկան ասաց՝ պատճառ չի եղել, որ նման խնդիր դնի: Նրա խոսքով՝ դեպքից հետո հանձնարարել է, որ նայեն, եթե կրակմարիչները քիչ են, ավելացնեն, որ նման խնդիրներից խուսափեն. «Զեկուցել են, որ բացի տակդիրներից՝ ամեն ինչ կատարված է»:

Նորիկյանը նաեւ հղում արեց  զորամասի նախկին հրամանատար Արգամ Գեւորգյանի ցուցմունքին, ըստ որի, դեպքից 10 օր առաջ Խաչատրյանին ուղեկցել է Ազատ գյուղի կացարան, ուսումնասիրություններ են  կատարել, հետաքրքրվեց կացարան այցելելու մասին:

«Զորամասի հրամանատարի հետ կացարանում չենք եղել: Եղել ենք Շորժայի ու Զոդի կացարաններում, հաճախակի ստուգումներ եղել են, բայց հենց Ազատի կացարանում չեմ եղել»,- պատասխանեց վկան:

Հարցին, թե բնակության  չափորոշիչներին կացարանի չհամապատասխանելու մասով որեւէ զեկուցագիր  ներկայացվե՞լ է, վկան պատասխանեց՝ ոչ:

Նորիկյանը հիշեցրեց, որ զորամասի նախկին հրամանատար Արգամ Գեւորգյանն իր ցուցմունքում հայտնել էր,  որ ինքը բազմիցս դիմել է վերադասին, որ ապահովեն բարեկարգ կացարաններով, սակայն չեն ապահովել: Խաչատրյանն ասաց՝ պատերազմից հետո տարբեր զեկուցագրեր են ստացել, որ չկան համապատասխան կացարաններ ընդհանուր զորամասի մասով: Բայց սեպտեմբերյան պատերազմից հետո այնպիսի իրավիճակ էր, որ շատ տեղերում նույնիսկ զինվորները վրաններում էին տեղակայված, այդ համեմատության վրա, Ազատի կացարանը նույնիսկ լավագույն կացարաններից էր համարվում:  Նորիկյանը հետաքրքրվեց՝ ՀՀ իշխանությունը տեղյա՞կ եղել է, որ ԶՈՒ մի ամբողջ զորամաս ապրում է չափորոշիչներին չհամապատասխանող շինություններում, նման պայմաններում, վկան պատասխանեց՝ պատերազմ էր, վերադաս կազմից հաճախակի այցելում էին, ինչ հնարավոր էր, արվել է, բայց  առաջնային աշխատանքները արվում էին  առաջնագծի վերականգնման ուղղությամբ:

Նորիկյանը վկայից նաեւ հետաքրքրվեց՝ քրեական վարույթի նյութերով պարզվել է, որ 2022 թվականի հոկտեմբերի 28-ին՝ Ազատ գյուղի կացարանի հրդեհի դեպքից երկու ամիս առաջ նույն զորամասի մարտական դիրքերից մեկում բենզինով վառարանը վառելու հետեւանքով կրկին հրդեհ է բռնկվել, հիշո՞ւմ եք նման դեպք:

-Մարտական հենակետում եղել է, նոր կահավորված հենակետում՝ սննդի պահեստի կողքին: Քննություն է  գնացել, մինչեւ հիմա երեւի գնում է, այդտեղ զենք էլ է եղել, խնդիրներ է  եղել:  Քննչականը զբաղվում էր դրանով, ինձ զեկուցել են, տեղեկացել ենք, կորուստներն ենք նայել, ներկայացրել գլխավոր շտաբ,- պատմեց վկան:

-Ունե՞ք նման տեղեկություն, որ զորամասի այլ ստորաբաժանումներից մեկում տագնապ է եղել,- այս հարցին էլ վկան պատասխանեց՝ չունեմ նման տեղեկություն:

Վկան բացառեց նաեւ այդ օրերի ընթացքում հակառակորդի որեւէ ստորաբաժանման կողմից դիվերսիոն հնարավոր գործողություններ, ինչի արդյունքում կարող էր հրդեհը բռնկվել:

-Բացառում եմ, որ դիվերսիայով մտնեին գյուղ,- պատասխանեց վկան:

Արփինե ՍԻՄՈՆՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Մեկնաբանություններն անջատված է:

Ամենաընթերցված

Օրացույց
Օգոստոս 2025
Երկ Երե Չոր Հնգ Ուրբ Շաբ Կիր
« Հուլ   Սեպ »
 123
45678910
11121314151617
18192021222324
25262728293031