«Որդիները շատ ցածր մակարդակի գործունեություն են իրականացրել բանակում։ Բայց որդիների մասին պետք է խոսեն այն մարդիկ, ովքեր պետք է մտածեն՝ իրենց որդիները որտե՞ղ են եղել, ի՞նչ են արել։ Եվ չի կարելի մարտի դաշտում վիրավորված մարդկանց դերակատարությունը նսեմացնել եւ ասել՝ «պատահական վիրավորվածություն»,- խորհրդարանում երեկ իրեն եւ իր որդուն ուղղված մեղադրանքին պատասխանեց «Հայաստան» խմբակցության ղեկավար Սեյրան Օհանյանը։
Հիշեցնենք, խորհրդարանում այսօր շարունակվում են ՀՀ գլխավոր դատախազության տարեկան հաշվետվության քննարկումները։ Դրանք վերածվեցին ընդդիմություն-իշխանություն հերթական լեզվակռիվների։ Իշխող ուժի պատգամավորներ Վահագն Ալեքսանյանը եւ Անդրանիկ Քոչարյանն էին մեղադրանքներ հնչեցրել Սեյրան Օհանյանի որդու հասցեին՝ ասելով, որ հարավային ուղղությամբ պատասխանատվությունը նրա եւ ԳՇ պետի տեղակալ Տիրան Խաչատրյանի ներքո է եղել եւ ճեղքումն այդ հատվածից է եղել։
Սեյրան Օհանյանը Անդրանիկ Քոչարյանին հորդորեց՝ «մարտի 1»-ից կրկին ու կրկին խոսելու փոխարեն, 44-օրյայի վերաբերյալ ընդդիմության առաջարկը քննարկի։ Իսկ ընդդիմությունն առաջարկել էր ԱԺ-ից դուրս համապատասխան օրենսդրությամբ ստեղծել համախոհության հանձնաժողով, որը պարիտետային հանձնաժողով կլիներ ու «չէր լինի այս իրավիճակը, որ իշխանություն ի պաշտպանություն իրեն կուրծք է ծեծում, ընդդիմությունն իր տեսակետն է պնդում, իսկ ժողովուրդը չի ստանում 44-օրյայի վերաբերյալ պատասխաններ»։
Սեյրան Օհանյանը պնդում է՝ մեղքը փորձ է արվում բանակի վրա դնել ամբողջությամբ, մինչդեռ պատասխանատվության աստիճանը պետք է հավասարաչափ բաշխված լինի՝ բանակում եւ բանակից դուրս։ Ըստ նրա, առաջին հերթին Ադրբեջանը պետք է միջազգային հարթակներում կրի պատասխանատվություն, այնինչ սանձարձակ կերպով շարունակում է Արցախի տարածքում պատմամշակութային հուշարձանները վերացնել, գերիներին պիտակավորել եւ ծաղրել։ Նաեւ՝ պատասխանատվություն պիտի կրեն այն դիվանագետները, ովքեր որ ստացել են 2019-ի փոխզիջումային տարբերակի առաջարկը եւ լռել են, «ծալել դրել են տակները, հետո ձեռ են առել ողջ դիվանագիտական կորպուսին, որ այդ փաստաթղթերը սառնարանի կամ դիվանի տակ էինք գտնում»։ Պատասխանատվություն պետք է կրեն պետական համակարգի այն մարդիկ, ովքեր 44-օրյայի ժամանակ «բանակի թիկունքին չեն կանգնել»։
Կարդացեք նաև
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
