«Եթե մարդիկ համարում են, որ Արցախը իրենցը չէր, երեւի դրա մեջ ճշմարտություն կա: Որովհետեւ մենք էլ ենք համարում, որ այն պահվածքը, որ ցուցաբերում են գործող իշխանությունները, իհարկե, Արցախն իրենցը չէր »,- այսօր Եռաբլուրում լրագրողների հետ զրույցում ասաց Արցախի նախագահ Սամվել Շահրամանյանը՝ արձագանքելով Նիկոլ Փաշինյանի պնդումներին, որ Արցախը մերը չի եղել:
Նա անդրադարձավ Փաշինյանի այլ հայտարարություններին էլ, մասնավորապես. «Փաշինյանը հայտարարում է՝ իրենք արդյունավետ իշխանություն են եւ դուրս են բերել ՀՀ-ն այն ճիրաններից, որում հայտնվել էր Արցախի շարժման արդյունքներում: Ուզում եմ հասկանալ՝ ինչ է նշանակում արդյունավետ իշխանություն, արդյունավետ լինելու համար իշխանությունը պետք է ունենա ծրագիր, պետք է ունենա ծրագիր իրականացնողներ եւ երեւի հենց դա նկատի ունի Փաշինյանը, երբ հայտարարում է , որ արդյունավետ իշխանություն են, որովհետեւ իրագործում են այդպիսի ծրագիր, առանց շեղվելու»:
Հիշեցնենք, որ մայիսի 9-ը տարիներ շարունակ Հայաստանում նշվել է որպես Եռատոն՝ Հայրենական մեծ պատերազմում տարած հաղթանակի, Շուշիի ազատագրման եւ Արցախի Պաշտպանության բանակի կազմավորման օր: Այսօր Եռատոնից մնացել է սոսկ հաղթանակի օրը:
Կարդացեք նաև
Անդրադառնալով Փաշինյանի այն հայտարարություններին, թե իրենց կառավարության չափ ոչ մեկ ոչինչ չի արել Արցախի համար, Շահրամանյանն այսպես արձագանքեց. «Այո՛, Հայաստանը որպես Արցախի անվտանգության երաշխավոր, աջակցություն ուներ ֆինանսական ու բոլոր առումներով, բայց դա չի նշանակում, որ ձրիակերի պես այնտեղ նստած էինք ու միայն օգտվում էինք Հայաստանի հարկատուների ու պետբյուջեի տված գումարներից» :
Արփինե ՍԻՄՈՆՅԱՆ
Լուսանկարն՝ արխիվային
