«Այս բոլոր դեպքերում, երբ հանիրավի հետապնդումներ են իրականացվում անմեղ մարդկանց նկատմամբ, կարծես թե, դա դարձել է նորմա: Ասում են՝ այդպես էլ պետք է լիներ, խնդիրը ո՞րն է, մի քանի ամիս անազատության մեջ գտնվեց, հիմա ազատության մեջ է: Ո՞վ է պատասխան տալու, խոսքը չի գնում իրավական պատասխանատվության մասին, ո՞վ է բարոյապես պատասխան տալու բոլոր այս մարդկանց անձնական տառապանքների համար»,- այսօր առաջին ատյանի ընդհանուր իրավասության դատարանում Բագրատ սրբազանի եւ մյուսների գործով դատական նիստում ասաց Բագրատ սրբազանի պաշտպան Հովհաննես Խուդոյանը:
Խուդոյանի խոսքով՝ իր համար հասկանալի չէ՝ ո՞նց էր կարելի թույլ տալ, որ Լիդյան առհասարակ ենթարկվի քրեական հետապնդման ու կրի ազատության սահմանափակումներ. «Լիդյա Մանթաշյանը քանի անգամ հարկադրաբար տարվել է ոստիկանություն քաղաքական ակցիա անելու համար: Ի՞նչ է եղել այն ոստիկանների հետ, որոնք իրեն տարել են, արձանագրել են իրավախախտում, բայց հետամուտ չեն եղել, որ վարչական պատասխանատվության ենթարկվի, տուգանվի, որովհետեւ հասկացել են՝ հիմք չկա: Բայց իր կյանքից 2-3 ժամ կտրել են: Այդ իրավապահների վերադասից որեւէ մեկը իր ենթակային թեկուզ բանավոր դիտողություն արե՞լ է, թե ինչո՞ւ եք քաղաքացուն ազատությունից ապօրինի զրկել:
Մենակ Լիդյայի մասին խոսքը չէ, Թոփալյան Արմենը, Աղվանը, Տիգրանն էլ Գալստյան էլի մի քանի օր ձերբակալված են եղել զենք պահելու կասկածանքով: Կեղծ օպերատիվ տվյալներ են ներկայացվել այս անձանց դեմ: Տեսնում ենք ՝ այդ փոքր գործերով համակարգն ինչպես է աշխատել, մարդկանց հանիրավի մեղադրել են զենք պահելու մեջ, նման բան չի եղել, բաց են թողել:
Կարդացեք նաև
Հետո մի օր էլ որոշել են՝ եկեք այս մարդկանց ավելի խորը ցավեցնենք ու ոչ ավել, ոչ պակաս՝ ահաբեկչության մեղադրանքներ: Միհրան Մախսուդյանին ձերբակալում են քաղաքական ակցիայի ժամանակ, ինչո՞ւ՝ փողոց էր փակել: Ծեծելով տարել էին, հասցրել հիվանդանոց՝ գանգուղեղային վնասվածքով, ճանապարհից էլ վզից խլել էին ոսկյա շղթան, այդպես էլ չիմացանք, թե որ ոստիկանն էր այդ պահը հաջողացրել»:
Խուդոյանն ասաց նաեւ՝ այս գործով իրավապահների ապօրինի բոլոր միջամտությունները քննության առարկա են դարձնելու ապացույցների հետազոտման փուլում ու չի լինելու մեկ մարդ, որը կասկած է ունենալու, որ այս գործով անցնող անձինք որեւէ վատ բան էին ուզում անել:
Արփինե ՍԻՄՈՆՅԱՆ
