Հայաստանի ժողովուրդը քվեարկեց ընտրություններում, որոնք վճռորոշ նշանակություն ունեն երկրի և Հարավային Կովկասի ապագայի համար։ Շնորհավորում ենք նրանց՝ իրենց ժողովրդավարական իրավունքներն իրականացնելու և իրենց ինքնիշխան կամքը խաղաղ ու կազմակերպված ձևով արտահայտելու կապակցությամբ։
Այս մասին ասված է Եվրոպական խորհրդարանի արտաքին հարաբերությունների հանձնաժողովի նախագահ Դևիդ Մաքալիստերի, Եվրանեսթի խորհրդարանական վեհաժողովի պատվիրակության նախագահ Սերգեյ Լագոդինսկու, Եվրոպական խորհրդարանի Հարավային Կովկասի հետ հարաբերությունների պատվիրակության նախագահ Նիլս Ուշակովսի, Հարավային Կովկասի հետ հարաբերությունների պատվիրակության փոխնախագահ և Եվրոպական խորհրդարանի ընտրությունների դիտարկման պատվիրակության ղեկավար Նատալի Լուազոյի, Եվրոպական խորհրդարանի արտաքին հարաբերությունների հանձնաժողովի Հայաստանի հարցերով մշտական զեկուցող Միրիամ Լեքսմանի և Եվրոպական խորհրդարանի ժողովրդավարության աջակցության և ընտրությունների համակարգման խմբի առաջատար անդամ Նաչո Սանչես Ամորի համատեղ հայտարարության մեջ։
«Ռուսաստանի Դաշնությունը հերթական անգամ ցուցադրեց այն երկրների ինքնիշխանության նկատմամբ լիակատար անհարգալից վերաբերմունք, որոնց նկատմամբ ձգտում է գերիշխանություն հաստատել։ Հայաստանի ընտրողների վրա բացահայտ սպառնալիքների, տնտեսական վնաս հասցնող առևտրային սահմանափակումների և մանիպուլյատիվ բովանդակության միջոցով ազդելու և նրանց մոլորեցնելու նրա անթաքույց փորձերը մեծապես ձախողվել են», – ասված է հայտարարության մեջ։
Նշվում է, որ Եվրոպական միությունն աջակցություն է ցուցաբերել, որպեսզի Հայաստանը կարողանա դիմակայել Ռուսաստանի ճնշմանը և ապահովել, որ Հայաստանի քաղաքացիները կարողանան կատարել ազատ ընտրություն։
Կարդացեք նաև
«Մենք խրախուսում ենք հետագա և ավելի լայն միջոցառումների իրականացումը՝ Հայաստանի դիմակայունությունն ամրապնդելու նպատակով, մասնավորապես՝ աջակցելով Հայաստանի տնտեսության դիվերսիֆիկացմանը և խթանելով ԵՄ-Հայաստան առևտուրը, օրինակ՝ ԵՄ-ի ինքնավար առևտրային միջոցների ընդունման միջոցով։ Մենք նաև ընդունում ենք վիզաների ազատականացման ուղղությամբ արագ առաջընթացի և ԵՄ գործընկերության նոր առաքելության արագ տեղակայման անհրաժեշտությունը», – նշել են պաշտոնյաները։
Նրանց գնահատմամբ՝ քվեարկության արդյունքները վկայում են Հայաստանի ընտրության մասին՝ հօգուտ խաղաղության և տարածաշրջանային համագործակցության, տարածաշրջանային կապակցվածության և Եվրոպական միության հետ առավել սերտ հարաբերությունների։
«Մենք ակնկալում ենք համագործակցել Հայաստանի նոր ընտրված Ազգային ժողովի և նոր կառավարության հետ՝ այս ուղով հետագա առաջընթացին աջակցելու և հայ ժողովրդին ավելի մեծ բարեկեցություն ապահովելու նպատակով։
Վստահ ենք, որ Հայաստանի ընտրական և հետընտրական գործընթացների հաջորդ փուլերը կհանգեցնեն ինստիտուցիոնալ և ժողովրդավարական ամրապնդմանը՝ հիմնված երկխոսության, ներկայացված քաղաքական ուժերի և հասարակության բոլոր հատվածների մասնակցության վրա, որպեսզի ավելի ամրապնդվեն ժողովրդավարական ինստիտուտները և բարձրանա հանրային վստահությունը ժողովրդավարական գործընթացների նկատմամբ», – ասված է համատեղ հայտարարության մեջ։
Թարգմանությունը՝ News.am-ի
