«Հակակոռուպցիոն կոմիտեի գործունեության մասին՝ դիմումներում նշված և ՍԴ-ում հնչած պնդումները, կից ներկայացված նյութերն այդպես էլ որևէ կերպ չհիմնավորեցին, որ Հակակոռուպցիոն կոմիտեն դուրս է եկել օրենքով իրեն վերապահված լիազորությունների շրջանակներից, խախտել քաղաքական չեզոքության սկզբունքը, կամ իրականացրել այնպիսի գործողություններ, որոնք իրենց բնույթով ու նպատակով կարող են գնահատվել որպես ընտրական գործընթացին միջամտություն»,- ՍԴ նիստի ժամանակ հայտարարեց ՀՀ Հակակոռուպցիոն կոմիտեի նախագահի տեղակալ Արմեն Ասատրյանը (լուսանկարում)։
Արդեն տեղեկացրել ենք, որ ՍԴ-ն ավարտեց հունիսի 7-ի խորհրդարանական ընտրությունների արդյունքները վիճարկող քաղաքական 7 ուժերի կողմից ներկայացված դիմումների քննությունը։
Որոշումը կհրապարակվի մինչև հուլիսի 4-ի օրվա վերջ։
Կարդացեք նաև
Ըստ Արմեն Ասատրյանի՝ դիմումատուների կողմից չներկայացվեց գեթ մեկ փաստական տվյալ, որը կհաստատեր պատճառահետևանքային կապ Հակակոռուպցիոն կոմիտեի գործողությունների և ընտրական վարքագծի կամ ընտրությունների արդյունքների միջև․ «Դիմողի ներկայացուցիչներն իրենց խոսքում շեշտեցին, որ ներկայացված ձայնագրությունները մոնտաժված են՝ փորձելով ասվածից բխեցնել դրանց անվստահելիությունը։ Սակայն մոնտաժված լինելը չի նշանակում կեղծված լիներ։ Տեխնիկական մշակումն իրականացվում է միայն այն նպատակով, որ առանձնացվեն գործի համար իրավական նշանակություն ունեցող հատվածները։
Ձայնագրությունների ամբողջական տարբերակները պարունակում են մեծածավալ անձնական, կենցաղային և գործին չվերաբերող խոսակցություններ, ուստի դրանք ամբողջությամբ չեն հրապարակվել, նաև մասնավորապես անձնական կյանքի անհարկի միջամտությունից խուսափելու նպատակով։ Հետևաբար իրավական նշանակություն ունեցող հատվածներն առանձնացնելը որևէ կերպ չի վկայում ձայնագրությունների կեղծման կամ բովանդակության խեղաթյուրման մասին և չի կարող հիմք հանդիսանալ դրանց ապացուցողական արժեքը կասկածի տակ դնելու մասով»։
ՍԴ նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
