«Վիճակագրական տվյալներով չես կարող նույնականացնել, թե քանի հոգի է եկել ընտրելու համար, բայց ականատես եղանք, որ ընտրությունների օրերին եկողների թիվը շատացել էր, ինչպես նաև ականատես եղանք՝ մարդիկ անպատասխանատու հայտարարություններ էին անում՝ եկել ենք՝ ընտրենք գնանք»,- ԱԺ «Հայաստան» խմբակցության պատգամավոր Արծվիկ Մինասյանի այն հորդորին, թե ներկայացրեք վիճակագրական տվյալներ, որոնք կհավաստեն այդ պնդումները, ԱԺ արտահերթ նիստի ժամանակ այսպես արձագանքեց ՔՊ խմբակցության պատգամավոր Ալխաս Ղազարյանը։
Արծվիկ Մինասյանն այս առիթով ասաց․ «Նենց ստացվեց, որ ՍԴ-ում այս պահանջը ներկայացվեց։ ԱԱԾ-ն վիճակագրություն ներկայացրեց։ Վիճակագրությունը բացարձակ կապ չունի Ձեր կողմից նշվածի հետ։ Կապ չունի՝ մարդը ընտրելու համար է եկել, թե՝ ոչ։ Ձեր ասած մտահոգությունը բացարձակ կապ չունի Հայաստան այդ ժամանակահատվածում այցելած քաղաքացիների թվերի հետ»։
Այնուհետև իր ելույթում Արծվիկ Մինասյանը ներկայացրեց վիճակագրությունը․ «2025-ի մայիս 25-ից հունիս 20-ի ընթացքում ՀՀ քաղաքացու և երկքաղաքացու փաստաթղթով ՀՀ է այցելել 154.115 անձ, 2026-ին՝ 157048 անձ։ Տարբերությունը 2933-ն է։ Նաև ելքի ցուցանիշները ներկայացնեմ՝ 2026-ին ՀՀ-ից ՀՀ քաղաքացու և երկքաղաքացու փաստաթղթով դուրս է եկել 152078 մարդ, 2025-ին՝ 149074 մարդ․ 3004 մարդու տարբերություն է։ Պաշտոնական ցուցանիշն է՝ ԱԱԾ-ի տված։ Այս վիճակագրությունը կարևոր է հասկանալու համար՝ արտաքին ազդեցության տեսանկյունից։ Էդ որ ասում եք՝ ՌԴ-ից եկածներ, լավ կլիներ՝ հարցնեիք նաև Եվրոպայինը։ Նենց չի, որ Ռուսաստանից եկածները ձեզ դեմ են քվեարկել, գուցե կարող է հակառակը լինել»։
Կարդացեք նաև
ԱԺ արտահերթ նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
