Ըստ «Երկրապահին» մոտ կանգնած աղբյուրների, այլեւս վերջնականապես լուծված է «Երկրապահի» հիման վրա նոր կուսակցություն ստեղծելու հարցը։ Օրերս համատեղ հայտարարությամբ հանդես կգան Հայաստանի Հանրապետական կուսակցությունը, «Երկրապահ» պատգամավորական խումբը եւ Երկրապահ կամավորականների միությունը, որ ստեղծում են նոր կուսակցություն։ Ասենք, որ ոչ բոլոր կամավոր եւ պատգամավոր երկրապահներն են տեղ ունենալու Հանրապետական կուսակցությունում։
ՄԱՔՍԱՅԻՆԸ՝ ՎԱՐԿԱՌՈ՞Ւ
Մայիս ամսին չկատարելով գանձումների պետական պլանը, ըստ «Առավոտ» հասած տեղեկությունների, ՀՀ մաքսային վարչությունը վարկ է վերցրել «Հայներարտբանկից», եւ փակել չհավաքված գումարի պարտքը։ Նույնը, սակայն, հունիս ամսին կարծես թե չի հաջողվել։ Հարց է ծագում. ինչպե՞ս է դա հաջողվել մայիսին։
ՀԱՅԿԱԿԱՆ ԼԵԲԵ՞Դ
Կարդացեք նաև
Վիկտոր Դալլաքյանը փորձում է ԱԺ-ում իր ելույթներն առավելագույնս հարստացնել սեփական «արտադրության» աֆորիզմներով։ «Զենքի մասին» օրենքի երկրորդ ընթերցման առնչությամբ օրակարգի մեջ համարելով իր «զինե՞լ, թե՞ չզինել հասարակությանը» հարցադրումը, պնդեց, թե այս օրենքի ընդունման դեպքում «զենքը կծնի իրավունք», կխորանա «զինված հարուստների եւ անզեն աղքատների» հակադրությունը եւ «Հայաստանում կշրջի հրացանակիր մարդու ուրվականը»։
ՊԱՇՏՊԱՆՈՒԹՅԱՆ ԼԱՎԱԳՈՒՅՆ ՁԵՎԸ
Արմավիրի նախկին մարզպետ Սեդրակ Հովհաննիսյանն այսպես արձագանքեց մեր այն հրապարակմանը, որ ինքը եւս «լռակյաց» պատգամավորների ցանկում է. «Ես, ճիշտ է, չեմ խոսում, բայց մեծ ուշադրությամբ լսում եմ»։
