Երեկ Ռոբերտ Քոչարյանին այցելած Մինսկի խմբի եռանախագահները բավական երկար մնացին նախագահի մոտ, շուրջ 1.5 ժամ, ինչից դրսում հավաքված լրագրողները եզրակացրին, որ հավանաբար ծանր եւ դժվար խոսակցություն է ընթանում:
Ի վերջո, ինչպես ամեն ինչ այս աշխարհում, այս հանդիպումն էլ ավարտվեց եւ համանախագահները դուրս եկան: Նրանք սահուն անցան լրագրողների մոտով, փորձելով չնկատել մեր գոյությունը, եւ երբ մեր գործընկերներից մեկը այնուամենայնիվ հարց հիշեցնող ինչ-որ բան ասաց, Յուրի Յուկալովը առանց շարժումը դադարեցնելու ետ դարձավ ու առաջարկեց դիմել իրենց պաշտոնական հովանավորին՝ ձեռքով իրենից ետ ցույց տալով: Մեքենա նստելուց առաջ նա մի պահ շրջվեց դեպի մեզ եւ ասաց. «Մենք բավարարված ենք»:
Ստացվեց խորհրդավոր, տարաբնույթ ենթադրությունների համար պարարտ արտահայտություն: Հայաստանում ՌԴ դեսպան Անդրեյ Ուռնովը փորձեց մի փոքր մանրամասնել, սակայն հասցրեց նշել միայն, որ հանդիպումը բովանդակալից էր եւ գոհացրել է մասնակիցներին: Յուկալովը նրան ընդհատեց. «Իմ ասածը բավարար է, գնացինք»: Ու շրխկոցով փակեց մեքենայի դուռը: Ափսոս էր «Մերսեդեսը»:
Ավելի խոսքաշատ էր Ֆրանսիայի ներկայացուցիչ Վոժիեն, որը մասնավորապես նշեց, որ նախքան Ադրբեջանի նախագահական ընտրությունները բանակցությունների ընթացքից գործնական արդյունք սպասելը ռեալ չէ: Իսկ այդ ընթացքում ԱՄՆ ներկայացուցիչը հասցրել էր հեռանալ:
Կարդացեք նաև
Ո. Մ.
