«Առավոտի» հարցին ի պատասխան, թե արդեն դիմե՞լ է դատախազությանը կոնյակի գործարանի, «Արմենիա» հյուրանոցի եւ ՀԱՈՒ-ի վերաբերյալ փետրվարի 25-ի քննարկումներում հրապարակված որոշակի փաստերի առնչությամբ, ԱԺ նախագահ Խոսրով Հարությունյանն ասաց. «Այժմ աշխատակազմը նախապատրաստում է ելույթներից որոշակի քաղվածքներ, որոնք այդ նամակի հիմքը կդառնան։ Եվ անկասկած, նամակն ուղարկվելու է դատախազություն»։
ՆԳ ԵՎ ԱԱ ՆԱԽԱՐԱՐՈՒԹՅՈՒՆԸ ԵՎՍ ՄԻ ՈԼՈՐՏ ՆՎԱՃԵՑ
«Ժողովրդավարական հայրենիք» կուսակցության անդամ Ղուկաս Մեհրաբյանին կառավարությանն առընթեր ստանդարտացման, չափաբանության եւ սերտիֆիկացման վարչության պետի պաշտոնից ազատելուց հետո, այդ տեղին հարմար թեկնածու են գտել՝ պրն Ազարյանին, որը ՆԳ եւ ԱԱ նախարարության աշխատակից էր։
Կարդացեք նաև
ՈՎՔԵ՞Ր ԵՆ ՄԱՆԿԱՊԱՐՏԵԶԻՑ ՏՈՒՆ ՇԻՆԵԼ
ԱԺ-ում Լեոնիդ Հակոբյանը հայտարարեց, որ ժամացույցի գործարանի մերձակայքում գտնվող մի մանկապարտեզի շենքը երկու հարուստներ են գնել՝ 102 երեխաների զրկելով այնտեղ հաճախելու հնարավորությունից։ Լեոնիդ Հակոբյանն այդ հարուստների անունները չտվեց եւ միայն նշեց՝ «նրանցից մեկն էլ այստեղ նստած է»։ «Առավոտին» հաջողվեց պարզել, որ այդ պատգամավորը «Կրեդիտ-Երեւան» բանկի վարչության նախագահ, «Բարեփոխումներ» խմբի անդամ Մարտին Հովհաննիսյանն է։ Իսկ մյուս մեծահարուստը Երեւանի ֆոնդային բորսայի նախագահ Սեդրակ Սեդրակյանն է։
100 ԿՄ-ԱՆՈՑ ԸՆՏՐԱՏԱՐԱԾՔ
Վերջնական տեսքի է բերված մեծամասնական ընտրատարածքների քարտեզը։ Տեղ-տեղ բաժանումը հասել է աբսուրդի. կա ընտրատարածք, որը ձգվում է մոտ 100 կմ։ Նախկին Վարդենիսի շրջանը, ուր կա շուրջ 27 հազար ընտրող, այսինքն՝ մոտ մեկ ընտրատեղամասի չափով, տրոհվել է մի քանի մասի։ Վարդենիսի տարածքի մի շերտը Կրասնոսելսկի եւ Մարտունու մի հատվածի հետ դարձել է մեկ ընտրատարածք։
