Մալայզիայի մայրաքաղաք Կուալալումպուրում շարունակվում են բողոքի ցույցերը՝ ՆԱՏՕ-ի կողմից Հարավսլավիան ռմբակոծելու դեմ։ Ամերիկյան դեսպանատան մոտ հավաքված ուսանողները նարինջ են շպրտում շենքի ուղղությամբ։ Սակայն ԱՄՆ հատուկ ծառայությունները մշակել են մի շարք միջոցառումներ՝ դեսպանատունը պաշտպանելու ուղղությամբ։ Դեսպանատան բակում շուրջօրյա աշխատում են մի խումբ սփյուռքահայ երիտասարդներ, որոնք խնամքով հավաքում են նարինջները եւ ուղարկում Հայաստան՝ որպես մարդասիրական օգնություն։ «Կփափագիմ աս ձեւով Հայրենիքիս օգտակար ըլլամ»,- «Առավոտի» թղթակցին ասաց մի սփյուռքահայ երիտասարդ։ Բողոքի եւ բարեգործության ակցիան շարունակվելու է ամբողջ շաբաթվա ընթացքում:
ՎԱՏ ԼՈՒՐ
«Մխիթար Սեբաստացի» կրթահամալիրում 1000-ի չափ ուսուցիչների, ծնողների ու շրջանավարտների՝ ի պաշտպանություն իրենց տնօրենի հրավիրված մեծ միջոցառումից քիչ անց ստացվեց կրթության եւ գիտության նախարարի հրամանը՝ Աշոտ Բլեյանի պաշտոնավարությունը ժամանակավորապես դադարեցնելու մասին։ Թեեւ հրամանում նշված է, որ սա դատախազի որոշմամբ է կատարվել, բայց ուսուցիչները համոզված են, որ այն արձակվել է ի պատասխան իրենց մեկօրյա նախազգուշական գործադուլի։ Ուսուցիչները գտնում են, որ պրն Բլեյանի պաշտոնը զուտ վարչական չէ եւ, հետեւաբար, նրան չի կարելի ազատել պաշտոնից:
