«Թիվ 17 ընտրատարածքում առնվազն 3 թեկնածու կիրառեցին ընտրակաշառքների համակարգը,- «Հայրենիք» դաշինքի ներկայացուցիչ Սոս Գիմիշյանը չցանկացավ մանրամասնել, թե ում են վերաբերում այդ պնդումները։- Իրենք էլ շատ լավ գիտեն, ժողովուրդն էլ՝ ումից եւ ինչ են ստացել։ Եվ դրա շնորհիվ ձեւավորվեց առաջին եռյակը»։
Նշենք, որ թիվ 17-ի առաջին եռյակը Վահան Հովհաննիսյանը, Ռաֆիկ Պետրոսյանը եւ Ռոմիկ Բալոյանն են (վերջին երկուսի տեղերը տարբեր են նշվում)։ Սոս Գիմիշյանը վիճարկեց Վահան Հովհաննիսյանի հաղթանակը. «Երկու- երեք տեղամասերում երկու օր ուշացումով են տվյալները մարզային եւ կենտրոնական հանձնաժողովներ հասել։ Գտնում եմ, որ դա նախեւառաջ առաջին եռյակից մյուս երկուսի գործն էր, բայց ցավոք սրտի, իրենք քաղաքական կամք չդրսեւորեցին, որ պայքարեին ճիշտ ընտրությունների համար։ Բայց չէին էլ կարողանալու»։ Հիշեցնենք, որ Սոս Գիմիշյանը եւս թիվ 17 ընտրատարածքի թեկնածու էր. «Ես ստացել եմ ինձ արժանի 450 ձայնը. ԱԺ-ում 4 տարվա իմ աշխատանքի արդյունքը դա էր, որ 30 հազար ընտրողից այդքանն ինձ կողմ քվեարկեցին։ Այդ վճիռն ընդունում եմ։ Հասկացա, որ ժողովրդին պետք չեն սկզբունքային (կներեք, ես ինձ այդպիսին եմ համարում), անշահախնդիր մարդիկ։ Կարող եմ հստակ ասել, որ մի լուցկու տուփ մի տեղից մյուսը չեմ տեղափոխել այս 4 տարվա մեջ։ Պարզվեց, որ ժողովրդին այդպիսի մարդիկ չեն հետաքրքրում։ Բոլոր նրանք, ովքեր չեկան ընտրությունների՝ իրենք էլ են կողմ նման ԱԺ-ին»։
Ի դեպ, սկզբունքայնության մասին. 17 ընտրատարածքի պարտված թեկնածուները մասնավոր զրույցներում ինչ ասես պատմում են՝ ծախսված ահռելի գումարների, բոթասից մինչեւ թմրադեղ բաժանելու եւ այլնի մասին։ Շրջանառության մեջ է վարկածը, թե տեղամասային հանձնաժողովների մեծամասնության ղեկավարությունը գրաված լինելու պայմաններում անգամ՝ Վահան Հովհաննիսյանն ընդամենը 12 ձայնի առավելությամբ է հաղթել (նրա նախընտրական շտաբի ղեկավարը պնդում է, թե հաղթանակն ապահովել են 314 ձայնի առավելությամբ), արհեստականորեն անվավեր են հայտարարվել առաջին եռյակի մյուս թեկնածուների օգտին տրված քվեաթերթիկները եւ այլն։
Բայց որեւէ մեկը բավականաչափ սկզբունքային եւ համարձակ չի՝ այս ամենը բարձրաձայնելու համար։ Գուցեեւ ճի՞շտ են՝ կռվից հետո բռունցքներ չեն թափահարում։
Կարդացեք նաև
Ա. Ի.
