ԿԸՀ-ն չգրանցեց լիբերալ-դեմոկրատ Ժիրինովսկու ներկայացրած ցուցակը՝ բլոկով։ Հանձնաժողովը համարձակություն ունեցավ հայտնաբերել ու հայտարարել, որ ցուցակում քրեական տարրեր կան։ԿԸՀ-ի այս վճռից Վլադիմիր Վոլֆովիչը իրեն հատուկ արագաշարժ տաքարյունությամբ նոր բլոկ կազմեց ու հայտարարեց. «Եթե ուզում են ունենալ աղքատ բերանբացների խորհրդարան, ապա կունենան։ Եթե ուզում են, որ խորհրդարանում լինեն այնպիսի մարդիկ, որ իրենց կոստյումի փողն էլ չեն կարող աշխատել, եւ միայն ամբողջ կոկորդով կգոռան խորհրդարանում, կունենան այդպիսի բլոկ»։ Մինչ Ժիրինովսկին հավաքում է իր այսպիսի բլոկը, Հայաստանում նախապատրաստվում են տեղական ինքնակառավարման մարմինների ընտրություններին։ Ինչպես եւ կարգն է, մերոնք եւս ԵրՄԸՀ են ներկայացրել իրենց եկամուտների հայտարարագիրը (վերջին մեկ տարում), ինչպես նաեւ՝ շարժական եւ անշարժ ունեցվածքը։ Թաղապետերի եւ քաղաքապետերի թեկնածուների մեջ առայժմ հայկական դիմագծերով ժիրինովսկիներ չեն հայտնաբերվել, բայց չկան նաեւ այնպիսիք, ովքեր «չեն կարող իրենց կոստյումի փողն աշխատել»։
Մերոնք այդքան աշխատելու շնորհքից բացի, դեռ մի բան էլ ավելին ունեն՝ մի քանի բնակարան, ինչպես օրինակ՝ Կենտրոն համայնքում առաջադրված Արայիկ Հայրապետյանը (8 բնակարան եւ կառույց), Էրեբունի համայնքում առաջադրված Մհեր Սեդրակյանը (Թոխմախի Մհեր), որի ներկայացրած հայտարարագրում ընդամենը 2 բնակարան է նշված։ Արաբկիր համայնքում առաջադրված Մաթեւոս Գեւորգյանը («Բուդկչի Մաթոս») երկու ՍՊԸ ունի, 2 բնակարան, այսքանը՝ ցուցակում նշվածներն են։ Նույն համայնքում առաջադրված Ֆելիքս Յայլոյանը, որի մասին, ի դեպ, խոսվում է, թե «անպայման դառնալու է» թաղապետ, իր հայտարարագրում նշել է, թե միայն մեկ սեփական տուն ունի Քասախ գյուղում եւ ընդամենը 2 ավտոմեքենա։ Նուբարաշենում առաջադրված թեկնածուներից Ռուբեն Ասատրյանը ազնվորեն խոստովանել է, որ 2 տուն ունի («բնակարան» եւ «սեփական տուն» տարբերակմամբ), երեք ավտոմեքենա։
Երեւան քաղաքում առաջադրված թաղապետի թեկնածուների ունեցվածքի մասին այսքանը հայտարարագրված տեղեկություն են։ Պարզապես Երեւանի մարզային ընտրական հանձնաժողովը երեւի մտքին չի դրել հայտնաբերել թեկնածուներից որեւէ մեկի «պրիմակովյան ժանգոտ ժիգուլին» կամ մի այլ թաղված հարստություն։ Երեւանի պատերն արդեն սկսել են կապտել եւ կանաչել թաղապետի թեկնածուների գովազդային լուսանկարներից։ Եվ որքան էլ տարօրինակ է, Ընտրական օրենսգիրքը թաղապետի թեկնածուների նախընտրական գովազդի համար ծախսվելիք գումարի սահմանափակում չի նշում։
Մ. Ե.
