Հանրապետության նախագահի նստավայր երեկ, ժամը 17-ի մատույցներում, իրար ետեւից ներս էին մտնում Վլադիմիր Մովսիսյանը, Շահեն Կարամանուկյանը, Խոսրով Հարությունյանը, Հայկ Նիկողոսյանը, Լեւոն Բարխուդարյանը, ՆԳ փոխնախարար Հունանյանը, ԱԺ պատգամավորներ Վարդան Խաչատրյանը, Արթուր Բաղդասարյանը, Արտաշես Գեղամյանը, Վազգեն Մանուկյանը, Շավարշ Խաչատրյանը, Վահան Հովհաննիսյանը, Սերգեյ Բադալյանը։ Կառավարության անդամները թաղման ծիսակատարության հետ կապված խնդիրները քննարկելու էին եկել, իսկ ԱԺ խմբերի եւ խմբակցությունների նախագահները, ինչպես Արտաշես Գեղամյանն ասաց՝ հանրապետության նախագահին իրենց զորակցությունը հայտնելու։ Զորակցությունը հայտնելը տեւեց մոտ մեկ ժամ։ «Ստեղծված իրավիճակում, երբ մեծագույն ազգային ողբերգություն է տեղի ունեցել, բոլորս պարտավոր ենք զսպվածություն դրսեւորել եւ Սահմանադրության միակ երաշխավորի շուրջը համախմբվել»,- ասաց Արտաշես Գեղամյանը։
Խոսքաշատ չէր նաեւ Վազգեն Մանուկյանը. «Հանրապետության նախագահի հետ հանդիպման ժամանակ քննարկվեց նոր ԱԺ ձեւավորելու հարցը, ֆիքսվեց, որ երկրի կայունությունն ապահովվի, քննարկվեցին զոհերի թաղման ծիսակատարությունների արարողության հարցերը՝ միասնական հանձնաժողովով»։ Երկրում այժմ կա նախագահ, ԱԺ-ն մոտ ժամանակներս կընտրի ԱԺ նախագահ, իսկ մինչ այդ ստեղծված է կոորդինացիոն մարմին՝ ֆրակցիաների ղեկավարների մասնակցությամբ։ Կհրավիրվի արտահերթ նիստ, որն իր աշխատանքը, փաստորեն, զրոյից կսկսի. նիստը կվարի ԱԺ ամենատարեց պատգամավորը։ Բայց այս ամենը՝ թաղման արարողությունից հետո։ Թաղումը կլինի հոկտեմբերի 31-ին։ Կհայտարարվի եռօրյա սուգ՝ հոկտեմբերի 29-ից 31-ը։ Ներքին գործերի, Ազգային անվտանգության նախարարների, հանրապետության գլխավոր դատախազի հրաժարականներ ներկայացնելու վերաբերյալ պրն Մանուկյանը հիշեցրեց, որ, առհասարակ, կողմ են իր գործը չկատարած մարդու հրաժարականին։ Ահաբեկիչների խմբի որեւէ մեկից ղեկավարվելու կապակցությամբ ասվեց հետեւյալը. «Իմ տպավորությունն այն էր, որ ոչ մի ուժ նրանց ետեւում՝ ոչ ներսում, ոչ դրսում, չկա։ Սկզբում շատ հարցեր էին առաջանում, բայց նրանց հետագա պահվածքը, նրանց ամեն ինչից զգացվեց, որ դա ոնց որ թե մարդկանց մի խումբ է (արկածախնդիր չէի ասի), որոնք համոզված են, թե իրենք մի օգտակար առաքելություն են իրականացնում այս երկրում։ Կարծում եմ՝ դատ կլինի, ամեն ինչը կիմացվի»։
Այսօր նախատեսվում է հանրապետության նախագահ Ռոբերտ Քոչարյանի հանդիպումը ԱԺ պատգամավորների հետ։
Լ. ԱՎԱԳՅԱՆ
