Վերջերս հաճախացել են այն խոսակցությունները, թե հնարավոր է, որ ՀՀ նախագահն առաջիկա ամիսներին լուծարի ԱԺ-ն եւ կլինեն արտահերթ ընտրություններ։ Անգամ նշվում են որոշակի ժամկետներ, եւ չեն բացառում նաեւ արտահերթ նախագահական ընտրություններ։ «Առավոտի» հարցին, թե արդյո՞ք այդպիսի հեռանկար կա, նախագահի մամուլի քարտուղար Վահե Գաբրիելյանը պատասխանեց. «Անգամ անցած տարի, երբ հասարակության զգալի մասը գտնում էր, որ այն ժամանակվա Ազգային ժողովը չէր արտացոլում հասարակության մեջ քաղաքական ուժերի իրական դասավորությունը, եւ կային ԱԺ-ն լուծարելու կոչեր, նախագահ Քոչարյանը չդիմեց այդ քայլին, համարելով, որ արտահերթ ընտրությունները երկրի քաղաքական կյանքում լավ նախադեպ չեն։
Այսօր, երբ կան համագործակցելու լավ հնարավորություններ, երբ Ազգային ժողովի մեծամասնությունը հայտարարում է, որ ՀՀ նախագահի քաղաքական հենարանն է եւ սատարում է կառավարությանը, նման խոսակցությունները միանգամայն անպատեհ են։
Կարելի է ենթադրել, որ նման լուրերը հատուկ են տարածվում. իրավիճակի կայունացումն ակնհայտորեն ոմանց սրտով չէ։ Մամուլին հետեւելը բավականաչափ հստակ պատկերացում է տալիս, թե ովքեր կցանկանային կրկին որեւէ ընտրության հնարավորություն ունենալ»։
Ա. Ի.
