ՀՀ նախագահի վերջին հրամանագրերի կապակցությամբ «Առավոտի» խնդրանքով այսպես արձագանքեց Սամվել Բաբայանը. «Ինչպես կա ձվադրման ժամանակ, այնպես էլ կա ճտերը հաշվելու ժամանակ։ Ճտերին սովորաբար հաշվում են աշնանը, Հայաստանի պարագայում կլինի ամռանը։ Սա չի վերաբերում ո՛չ նախագահի մնալ-չմնալուն, ո՛չ էլ խորհրդարանի լուծարմանը։ Խոսքը Հայաստանի սոցիալ- տնտեսական վիճակին եւ արտաքին քաղաքականությանն է վերաբերում»։
Առավել մանրամասնել ասվածը, պրն Բաբայանը չկամեցավ։
ՆԱԽԱՔՆՆԱԿԱՆ… ԱՅՑԵԼՈՒԹՅՈՒՆՆԵՐ
Կարդացեք նաև
Ինչպես հայտնի դարձավ, երեկ ՀՀ նախագահին առընթեր մարդու իրավունքների հանձնաժողովի անդամները կրկին այցելել են մեկուսարան՝ հոկտեմբերի 27-ի գործով կասկածյալներին։ Չի բացառվում, որ առաջիկայում մեկուսարաններ այցելեն «գործող» լրագրողներ։
ԼՈՒՅՍԻ ԿԻՆԸ
Ղարաբաղում շարունակվում են այն պաշտոնյաների բացահայտումները, որոնք չարամտորեն խուսափում են վճարել օգտագործված էլեկտրաէներգիայի վճարները։ Մասնավորապես, ըստ ղարաբաղյան մի աղբյուրի՝ ԼՂՀ արտգործնախարար Նաիրա Մելքումյանը մեկ տարի երկու ամսվա ընթացքում ծախսել է ընդամենը 13 հազար դրամի հոսանք։
ԼՂՀ պաշտոնյաների ժուժկալ կենցաղի հետեւանքով խնայած գումարների մասին առավել մանրամասն տեղեկություն կտանք վաղվա «Առավոտում»։
ԽԼԽԼՈՑԻ
Երեկ դատական նիստի ընթացքում լսելով Աշոտ Բլեյանի հարցերը հերթական վկային՝ դատավոր Իսկուհի Վարդանյանն ասել է. «Այս էլ երկրորդ օրն է՝ իմ հարցերը խլում եք»։ Աշոտ Բլեյանն այսպես է արձագանքել. «Դուք իմ կյանքն եք խլում, ես էլ Ձեր հարցերը խլեմ»։
