Թերթերն արդեն գրել էին, որ Թատերական ինստիտուտի հետնամասում կառուցվող տունը, ըստ որոշ լուրերի, պատկանում է ԱԺ նախագահ Արմեն Խաչատրյանին։ ԱԺ մամուլի ծառայությունը հերքել է այդ լուրերը։ Քաղաքապետարանի՝ համապատասխան ծառայությունից նույնպես ժխտեցին, թե տանտերը Արմեն Խաչատրյանն է՝ կրկնելով, թե տարածքը տրված է քաղաքապետարանի՝ մարտի 29-ի թիվ 339 որոշման հիման վրա, Մ. Խորենացու 24 հասցեում բնակվող Արթուր Խաչատրյանին։ Սակայն քաղաքապետարանին մոտ կանգնած աղբյուրները պնդում են, թե եթե անգամ գրանցված անձը Արթուր Խաչատրյանն է, իրական սեփականատերը բարձրաստիճան մի սպա է, որի անունն առայժմ հարմար չենք գտնում հրապարակել։ Ամեն ինչ արվել է այնպես, որ քաղաքապետարանի միջին տրամաչափի պաշտոնյաները ոչինչ չիմանան. նրանցից մեկը պնդում էր, թե իրենց իմանալով՝ սեփականատերը Մոսկվայում է եւ ուշ-ուշ է այցելում Հայաստան։
Հիշյալ «այցելուի» հարեւանները, սակայն, արդեն վախեցած են. բանն այն է, որ երեկոյան ժամերին խիստ որոշակի գերատեսչությանը պատկանող մեքենաների հայտնվելուց հետո նրանք հրաժարվել են բողոքել այն բանի դեմ, որ տան պարիսպը կառուցվել է մերձակա մանկապարտեզի տարածքում։ Բարեհոգի հարեւանները համբերությամբ սպասում են իրական տիրոջ հայտնվելուն։ Իսկ թե ով է իրական տերը. մենք կհայտնենք ընթերցողին սեպտեմբերին։
Սեփ. լր.
