Արդյոք ՀՀԿ-ն ու ՀԺԿ-ն միայն սեփական ուժերով կարո՞ղ են ԱԺ նախագահի հարց լուծել, մանավանդ, որ խորհրդարանական այլ կազմավորումների մեծամասնությունը եւ անգամ ՀԿԿ-ն կարծես տրամադիր չէ կողմ քվեարկել Աշոտ Գալոյանին։ «Առավոտի» այս հարցադրմանն ԱԺ փոխնախագահ Տիգրան Թորոսյանն այսպես արձագանքեց. «Ձեր հարցի պատասխանը շատ պարզ ու թվաբանական է։ Դա այնքան ակնհայտ է, որ անգամ պատասխանելու կարիք չկա»։ Նշենք, որ ՀՀԿ-ի եւ ՀԺԿ-ի միասնական ձայների թիվը 50-ի էլ չի հասնում։
ԹԱՐԳՄԱՆՈՒԹՅՈ՞ՒՆՆ ԷՐ ՍԽԱԼ, ԹԵ՞…
ԱԺ պատգամավոր Խորեն Սարգսյանի ներկայացմամբ, շուրջ մեկ ամիս առաջ, երբ Եվրամիություն-Հայաստան խորհրդարանական հանձնաժողովի նիստում արտգործնախարար Վարդան Օսկանյանին հարցրել են Մեղրի-Լաչին տարածքային փոխանակման մասին եւ նա հստակ պատասխանել է, որ նման հարց գոյություն չունի եւ իրենք մերժում են նմանատիպ բոլոր խոսակցությունները, Եվրամիության ֆրանսիացի ներկայացուցիչը հարց է տվել. «Մենք երեկ ենք եղել ՀՀ նախագահի մոտ ու Մեղրիի կապակցությամբ լսել ենք եւ նրա կարծիքը… Մի՞թե ձեր միջեւ տարաձայնություններ կան»։ Այս միջադեպի վերաբերյալ «Առավոտը» մեկնաբանություններ խնդրեց ԱԳՆ խոսնակ Արա Պապյանից։ «Քանի որ խոսակցությունն ընթացել է անգլերեն, գուցե թյուրըմբռնում է եղել պատգամավորի կողմից,- ենթադրեց պրն Պապյանը։- Նախարար Օսկանյանը եւս մեկ անգամ հստակեցրել է, թե նման առաջարկ եղել է եւ այն ի սկզբանե մերժվել է»։
Կարդացեք նաև
ՊԵՏՈՒԹՅԱՆ ՄԻՋԱՄՏՈՒԹՅՈՒՆ ՊԵՏՔ ՉԷ՞
«Հայաստանի Հանրապետությունը այսօր կողմնակալություն է անում, խառնվում է հարցերի եւ տեղի-անտեղի հայտարարություններ անելով, համայնքում վարում է Թուրքիայի տեսանկյունից ոչ կոնստրուկտիվ քաղաքականություն»,- ասում է ԱԳ նախկին նախարար Ալ. Արզումանյանը։
