Երեք օր առաջ Մոսկվայից Երեւան թռչող ինքնաթիռով, ըստ ուղեւորներից մի քանիսի, Երեւան են տեղափոխել մի գեներալի, որի դեմքին դիմակ կար, եւ միայն ուսադիրներից է երեւացել նրա գեներալ լինելը։ «Զվարթնոցում» նրան դիմավորել են ոստիկանական հատուկ ավտոմեքենաներով։ Թե ով էր գեներալը, ինչ ազգության, ինչ նպատակով էր դիմակը դեմքին Երեւան բերվում, մեզ չհաջողվեց ճշտել ոչ ՆԳ, ոչ էլ մանավանդ ազգային անվտանգության նախարարություններից։ Պաշտպանության նախարարության լրատվականի հեռախոսը միալար զբաղված էր։
ՄԵՐ ԸՆԴՀԱՆՈՒՐ ՊԵՏՈՒԹՅՈՒՆԸ
Որոշ քաղաքագետներ կարծում են, թե քանի որ ԱԺ-ում ոչ կոնվենցիոնալ իրավիճակ է ստեղծվել՝ լուծումները պիտի լինեն կոմպլեմենտար։ ՍԴ-ի որոշումից հետո Արմեն Խաչատրյանը կլինի դե յուրե ԱԺ-ի կազմում, դե ֆակտո՝ անկախ։ Իսկ խորհրդարանում նրա կարգավիճակի վերաբերյալ կգործի «մի հարցրու, մի պատասխանիր» սկզբունքը։ Ընդհանրապես, քանի որ Արմեն Խաչատրյանի խնդիրն էլ է դարձել «հայկական հարց», քաղաքագետները պատահական չեն համարում, որ ՍԴ-ում հոկտեմբերի 27-ին նրա գործի քննությունը համընկել է ԱՄՆ Կոնգրեսում Ցեղասպանության բանաձեւի քննարկման հետ։
Կարդացեք նաև
ՍԻՄ-Ի ԿԱԶԱՆՈՎԱՆ
Վերջերս «Իրավունքի» «Շաբաթվա զարմանք» խորագրի թեմա էր դարձել, որ ոստիկանները փորձել էին տուգանել եւ քաղմաս տանել համբուրվող մի զույգի։ Ճիշտ է, սա հին եւ «բարի» ավանդույթ է, սակայն տվյալ դեպքում, մեր տեղեկություններով՝ խորագրի վարողն իր հետ իսկ պատահած դեպքի վրա էր զարմացել։ Հովհաննես Գալաջյանը ոչ հերքեց, ոչ էլ համեստորեն հաստատեց, թե հենց իրեն էին փորձել տանել քաղմաս։
