Նույնիսկ դատական մարմինների ներկայացուցիչները լուրջ չեն վերաբերվում մեր օրենսդիր մարմնի գործունեությանը։
Այլ կերպ հնարավոր չէ որակել այն փաստը, որ առաջին ատյանի դատավորը տեղյակ չէր երկու ամիս առաջ ԱԺ-ում ընդունված՝ օրենքում փոփոխություններ եւ լրացումներ կատարելու մասին օրինագծին։ Սակայն, տեղյակ չլինելով, սխալ որոշում կայացնելու փաստը մեր քաոսային կյանքում այնքան էլ արտառոց երեւույթ չէ։ Դատավորը չի ձգտում իր կայացրած ակնհայտ սխալ որոշումը ժամ առաջ ուղղել։
Հունվարի 15-ին նման դժվարին կացության առաջ կանգնեց Էրեբունի եւ Նուբարաշեն համայնքների առաջին ատյանի դատարանի դատավոր Ա. Սուքոյանը։ Դեկտեմբերի 26-ին հայցվորներ Գեւորգ Մալխասյանի եւ Ռոբերտ Ավագյանի («ԻՐՏԵԿ» ՓԲԸ) միջնորդությամբ արգելանք էր դրվել օրենքների եւ գերատեսչական ակտերի հրատարակությամբ զբաղվող «Ջոինթ Ֆայնենշլ Գրուպ» ՍՊ ընկերության գույքի եւ դրամական միջոցների վրա։ Վերջիններս, սառեցված աշխատանքի հետեւանքով ունեցած հնարավոր վնասների փոխհատուցելու միջնորդությամբ, դիմել էին դատարան։
Դատավոր Ա. Սուքոյանը միջնորդությունը մերժել էր։ Միեւնույն ժամանակ դատավորը տեղյակ չէր, որ նախորդ տարվա նոյեմբեր ամսին ԱԺ-ն օրենքում փոփոխություններ անելու օրինագիծ էր ընդունել։ Փոփոխություններում արձանագրվում է, որ դիմողի պատասխան միջնորդությունը չբավարարելու դեպքում վերացվում է նաեւ հակառակ կողմի միջնորդությամբ ընդունված արգելման միջոցը։ Այսինքն՝ կիրառվում է իրավահավասարության սկզբունքը եւ երկու ընկերություններին թույլատրվում է ազատ աշխատել։ Միջնորդության վերաբերյալ սխալ որոշում կայացնելուց մեկ օր անց օրենքում կատարված փոփոխությունների մասին իմանալուց հետո էլ Ա. Սուքոյանը չշտապեց վերանայել իր վճիռը։ Նախընտրեց այս ակնհայտ պարզ իրավիճակը քննարկել վճռաբեկ դատարանի նախագահի հետ։
Կարդացեք նաև
Իսկ ՋՖԳ ընկերությունը շարունակում է լուրջ վնասներ կրել։
ԱՐՄԵՆ ՎԱՐԴԱՆՅԱՆ
