Զանգվածային լրատվամիջոցները երեկ տարածել էին մի տեղեկատվություն, ըստ որի՝ Թուրքիայի շախմատի ֆեդերացիայի պաշտոնական հովանավոր «Is Banki»-ի հրավերով պետք է Ստամբուլ ժամաներ աշխարհի նախկին չեմպիոն Գարրի Կասպարովը: Ըստ ադրբեջանական «Թրենդ» գործակալության, Կասպարովը Ստամբուլում ներկա էր լինելու կազմակերպվելիք մի գիտաժողովի եւ «Իմ ուսուցիչները» գրքի շնորհանդեսին, որի թուրքերեն թարգմանությունը հրատարակվել է հիշյալ բանկի ֆինանսական աջակցությամբ: Գաղափարն ու նախաձեռնությունը, ինչ խոսք, ողջունելի են, եթե, իհարկե, իրականությունը ներկայացվի առանց կանխամտածված խեղաթյուրումների, մի բան, որի վրա ադրբեջանական քարոզչությունն անթերի է աշխատում: Թե ինչպե՞ս կմատուցվի իրականությունը, առայժմ դատողություններ չենք ուզում անել: Ամեն բան կախված է լինելու Կասպարովի տրամադրվածության աստիճանից: