![\"\"](\"https://www.aravot.am/2010/aravot_arm/February/2/p3.jpg\")
Զարուհի Փոստանջյանի մասին ասում է ՀՅԴ բյուրոյի անդամ, ՀՅԴ խորհրդարանական խմբակցության ղեկավար Վահան Հովհաննիսյանը:
– Ինչպե՞ս եք վերաբերվում այն հայտարարություններին, որ ԵԽԽՎ Հայաստանի պատվիրակությունում «Ժառանգության» ներկայացուցիչ Զարուհի Փոստանջյանը ե՛ւ ԵԽԽՎ մոնիտորինգի հանձնաժողովի նիստում, ե՛ւ «Առավոտին» տված հարցազրույցում արել էր ՀՅԴ հասցեին: Մասնավորապես, թե քանի որ ՀՅԴ-ն եղել է իշխանության մեջ՝ ունի իր մեղքի բաժինն այն հանցագործությունների համար, որ անցած 10 տարիների ընթացքում եղել են Հայաստանում, իսկ հանցագործություն կատարածն իրավունք չունի ներկայացնել իր զոհի իրավունքներն ու կարծիքը:
– Յուրաքանչյուր քաղաքական միջավայրում, այդ թվում նաեւ՝ հայկական, պարբերաբար առաջանում են կերպարներ, որոնց դերակատարությունն այդ միջավայրում ավելի շատ կրկեսային է: Ռուսաստանում կան նման մարդիկ եւ ցանկացած այլ երկրում: Ես կարծում եմ՝ հնչած անհեթեթ մեղադրանքներին բովանդակային պատասխան տալն անիմաստ է, նպատակահարմար չեմ գտնում: Ինձ համար միայն հետաքրքիր է՝ դա անհատ քաղաքացու եւ պատգամավորի՞ տեսակետ է, թե՞ այն կուսակցության, որի անունից նա մինչ օրս հանդես է գալիս: Սա՛ է մեզ համար հետաքրքիր, այլ ոչ թե այն, ինչ ասում է տիկին Փոստանջյանը:
– ՀՅԴ-ն համագործակցում է «Ժառանգության» հետ: Չե՞ք փորձել անցած օրերին պարզել, թե արդյոք Զարուհի Փոստանջյանն արտահայտում էր իր կուսակցությա՞ն գնահատականները:
– Դեռ չենք փորձել, բայց կպարզենք:
– Ինչպե՞ս եք վերաբերվում այն հանգամանքին, որ ընդդիմադիր կուսակցությունները չեն կարողանում միմյանց հետ համագործակցաբար աշխատել միջազգային կառույցներում:
– Պետք չէ մոռանալ, որ ընդդիմադիր դաշտում է իրեն դիրքավորում նաեւ Լեւոն Տեր-Պետրոսյանի ղեկավարած Հայ ազգային կոնգրեսը: Եվ դատելով տիկին Փոստանջյանի մեղադրանքների բովանդակությունից ու բառապաշարից՝ նա տվյալ դեպքում կատարում է ՀԱԿ-ի հանձնարարությունը, այլ ոչ թե «Ժառանգության»: (Ճիշտ նույն բառընտրությամբ երեկ ասուլիսում այս մասին խոսեց նաեւ ՀՅԴ Հայաստանի ԳՄ ներկայացուցիչ Արմեն Ռուստամյանը. «Դաշնակցությանը մեղադրել մեղսակից լինելու մեջ՝ սա արդեն դժբախտաբար այն նույն բառապաշարն է, որն օգտագործում է ՀԱԿ-ը մեր դեմ: Շատ զարմանալի էր լսել ինձ համար, որ տիկին Փոստանջյանը նույն բառապաշարով է առաջնորդվում: Եվ սա ինձ համար իսկապես շատ մեծ անսպասելի անակնկալ էր».- Ա. Ի.) Ես կարծում եմ, որ ՀԱԿ-ի կողմից սա «Ժառանգությունն» իր պատվերների կատարողը դարձնելու առաջին փորձը չէ: Պարզապես ժամանակ առ ժամանակ նրանք գտնում են այդ քաղաքական միջավայրի հերթական ծաղրածուին ու փորձում նրա միջոցով ասել այն, ինչն այլապես, երբ իրենք են ասում՝ այլեւս լսելի չէ:
– Ձեր գնահատականն արդարացի չէ, քանի որ Զարուհի Փոստանջյանը ոչ պակաս ուժգնությամբ քննադատում է նաեւ Լեւոն Տեր-Պետրոսյանին: Իսկ ՀՅԴ ներկայացուցչի նկատմամբ քննադատությունը թերեւս պայմանավորված է նաեւ այն հանգամանքով, որ նա ԵԽԽՎ-ում գերազանցապես հանդես է գալիս կոալիցիոն ուժերի հետ համագործակցաբար:
– Ինչ վերաբերում է միջազգային տարբեր կառույցներում Հայաստանի խորհրդարանական պատվիրակությունների գործունեությանը, կարծում եմ, որ դրանց հիմնական առաքելությունը Հայաստանի ազգային շահերի պաշտպանությունն է: Եվ ազգային ընդհանրական շահերի այդ պաշտպանությունը Դաշնակցության գործն է եղել մի՛շտ եւ լինելու է մի՛շտ: Ով որ չի հասկանում այդ առաքելությունը եւ միջազգային բեմերը դարձնում է սեփական երկրի խորտակման միջոց՝ մեզ համար… ուղղակի հասկանալի չէ:
– Այս ամենն ինչպե՞ս կանդրադառնա ՀՅԴ-«Ժառանգություն» համագործակցության վրա, մանավանդ որ՝ այն արդեն իսկ ճաքեր է տվել ՍԴ որոշման նկատմամբ տարաբեւեռ մոտեցումների հետեւանքով:
– Կարծում եմ, որ տարաբեւեռ չեն մոտեցումները, այլ ավելի շատ՝ մարտավարական բնույթի: Քանի որ չեն փոխվել ռազմավարական նպատակները, որոնք մենք տեսնում ենք՝ հայ-թուրքական արձանագրությունների հետ կապված: Պարզապես, իմ կարծիքով, մեր դիրքորոշման մեջ ավելի շատ ճկունություն կա եւ հետագա պայքարի հնարավորությունները չվերացնելու քաղաքականություն: Այսինքն՝ մենք միշտ հետեւյալ սկզբունքով ենք գործում. երբ դուռ ես շրխկացնում՝ փակում ես քո իսկ ճանապարհը դեպի հաղթանակ:
– Դուք դա արդեն ասել էիք ասուլիսի ընթացքում, բայց այդ պարզաբանումներից հետո էլ «Ժառանգություն» խմբակցության ղեկավարն ակնարկեց, թե այսուհետ իրենք առանձին կանցկացնեն իրենց բողոքի գործողությունները:
– Եթե քաղաքական որեւէ կազմակերպություն կարողանա արձանագրությունների դեմ կազմակերպել սեփական ակցիաներ՝ մենք միայն ուրախ կլինենք: Եվ եթե կազմակերպելու լինի որեւէ մեկը՝ չի բացառվում, որ մենք էլ միանանք:
