Գիտնականներին հաջողվել է բացահայտել լուսնոտության այն գենետիկ կոդը, որը ստիպում է մարդկանց քայլել քնի մեջ: Ուսումնասիրելով լուսնոտների ընտանիքի 4 սերունդ՝ նրանք պարզել են, որ ԴՆԹ-ի միայն մեկ արատավոր նմուշը բավարար է, որպեսզի մարդը տառապի լուսնոտությամբ: Հետազոտողները հույս ունեն, որ կկարողանան որեւէ կերպ ազդել այդ գեների վրա եւ այդպիսով առաջ կգան այս խանգարման բուժման նոր ձեւեր: Լուսնոտությունը հանդիպում է 50 մեծահասակներից մեկի, ինչպես նաեւ երեխաների 10%-ի մոտ: Սովորաբար այդ երեւույթը ժամանակի ընթացքում անցնում է: Սակայն գոյություն ունեն լուսնոտության առավել ծայրահեղ տեսակներ: Ոչ լրիվ եւ ոչ խորը արգելակման դեպքում մարդը քնած ժամանակ խոսում է, նստում անկողնում: Լուսնոտությունն ավելի արտահայտված խանգարում է, երբ քնած մարդը վեր է կենում անկողնուց, քայլում աննպատակ կամ երազի ազդեցությամբ, իսկ առավոտյան այդ մասին հիշում է աղոտ կամ բոլորովին չի հիշում: Փորձագետները վստահ են, որ այս խանգարումը հանդիպում է այն ընտանիքներում, որոնք նախատրամադրված են դրան:
