Ֆրանսահայ բժիշկների միության Փարիզի մասնաճյուղն այսօր շարժական ատամնաբուժական կլինիկա տրամադրեց Լոռու մարզին, որն անվճար կսպասարկի մինչեւ 18 եւ 60-ից բարձր տարիք ունեցող ազգաբնակչությանը: Լոռու մարզպետարանի առողջապահության եւ սոցիալական ապահովության վարչությունից տեղեկացնում են, որ շարժական կլինիկան գյուղ առ գյուղ կշրջի եւ գյուղից դուրս կգա միայն այն դեպքում, երբ սպասարկվեն նշված տարիքային խմբերի բոլոր մարդիկ: «Բացի պրոթեզավորումից, յուրաքանչյուր հիվանդություն կբուժվի, նաեւ պրոֆիլակտիկա է նախատեսվում»,- ասում է Լոռու մարզպետարանի առողջապահության եւ սոցիալական ապահվության առողջապահության վարչության պետ Լուսինե Վարդանյանը:
Վարչությունից տեղեկացանք նաեւ, որ սա առաջին նմանատիպ ծրագիրն է, որի շահառուները սոցիալապես անապահով խավն է:
Թեեւ մարզկենտրոն Վանաձորում մանկական բարեգործական 2 կլինիկա կա, բայց սպասարկում է 0-15 տարեկան խմբին, ու պետպատվերի շրջանակում կենսաթոշակային տարիքի բնակչությանը: «Գյուղերում այս բացը կա: Ըստ ծրագրի, մինչեւ վերջին մարդը չհետազոտվի ու չսպասարկվի, մեկ թե հինգ տարի կտեւի, կլինիկան մնալու է մեր մարզում»,– ասում է Լուսինե Վարդանյանը:
Շարժական կլինիկայի հաջորդ կանգառը Տավուշի մարզն է: Ողջ Հայաստանով շրջելը, բուժանյութերի ձեռքբերումն ու բժիշկների վարձատրությունը կարժենա մոտ 100 հազար եվրո:
Կարդացեք նաև
Նելլի ԴԱՎԹՅԱՆ