Հայաստանի Հանրապետության արդարադատության նախարարի 2011թ. դեկտեմբերի 1-ի հրամանով փոփոխություն է կատարվել հիմնադրամների կողմից հրապարակվող հաշվետվության ձեւում, ինչպես նաեւ դրանց լրացման ու հրապարակման կարգում: Ըստ ՀՀ արդարադատության նախարարության պաշտոնական կայքէջի, փոփոխության արդյունքում հիմնադրամների պաշտոնատար անձինք այսուհետեւ պետք է գործունեության հաշվետվությունները լրացնեն ՀՀ արդարադատության նախարարության պաշտոնական կայքում հրապարակված ձեւի համաձայն:
Մամուլում հրապարակելուց հետո, 30 օրվա ընթացքում հաշվետվությունը հրապարակելու մասին հիմնադրամները ծանուցում են Հայաստանի Հանրապետության արդարադատության նախարարությանը՝ նախարարության աշխատակազմի օրինականության վերահսկողության տեսչության պետի անունով գրությամբ, որին կից ներկայացվում են հաշվետվությունը եւ լրատվամիջոցի օրինակը: Գրությունը պետք է բովանդակի տեղեկություններ ՀՀ հրապարակային ծանուցումների պաշտոնական ինտերնետային կայքում (www.azdarar.am) համապատասխան հայտարարության տեղադրված լինելու մասին:
Նախարարությունը հիշեցնում է, որ հիմնադրամների գործունեության հաշվետվությունները սահմանված կարգով չհրապարակելը առաջացնում է վարչական տույժ՝ վարչական իրավախախտումների վերաբերյալ օրենսգրքի 169.18-րդ հոդվածի համաձայն:
«Առավոտ» օրաթերթ
