Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր սկսվեց «Մասնավոր խուզարկու» Վլադիմիր Թուրաբյանի դեմ հարուցված քրեական գործով դատական վիճաբանությունների փուլը:
Մեղադրողը հաստատած համարեց այն, որ Վլադիմիր Թուրաբյանը զբաղվել է օրենքով արգելված գործունեությամբ՝ լրատվամիջոցներում մասնավոր խուզարկուի մասին հայտարարություն տալով՝ տեղեկություններ է հավաքել, որով խախտվել է մարդկանց անձնական եւ մասնավոր կյանքի գաղտնիքը:
Ըստ վկաներից մեկի տված ցուցմունքի, Թուրաբյանը պատվիրատու մի կնոջ ցանկությամբ հետեւել է նրա ամուսնուն: Ամուսինը պարզվել է, որ ժամանակ է անցկացնում թեթեւաբարո կանանց հետ, շոգեբաղնիքում:
Վլ.Թուրաբյանը իրեն մեղավոր չի ճանաչել եւ չի ճանաչում այսօր էլ: Եվ նախկինում էլ դատապարտվել է մասնավոր խուզարկուի գործունեությամբ զբաղվելու համար:
Կարդացեք նաև
Մեղադրողը միջնորդեց մեկ ամսվա կալանք կիրառել Թուրաբյանի նկատմամբ:
«Մասնավոր խուզարկուն» կպատրաստվի պաշտպանական ճառին, այդ կապակցությամբ նա դատարանից խնդրեց ժամանակ:
Aravot.am-ի հետ մինչ զրույցը սկսելը, «Մասնավոր խուզարկուն» փորձեց ճշտել, թե ինչն է հատկապես հետաքրքրում այս գործով: Պատասխանեցինք՝ բնականաբար՝ տիեզերագնացի կարգավիճակին հավասար, խուզարկուի հայաստանյան կարգավիճակը: Վ.Թուրաբյանը հայտնեց, որ մասնավոր խուզարկուի գործունեությամբ զբաղվելու համար օրենք գոյություն չունի, այսինքն, այն արգելված չէ, եւ յուրաքանչյուր քաղաքացի կարող է զբաղվել իր սիրած գործով: Նա տեղեկացրեց, որ իր «գործով» իրականում տուժող չկա եւ ինքը կարծում է, որ ինչ էլ որ լինի, շարունակելու է զբաղվել «Մասնավոր դեդեկտիվի» գործունեությամբ:
Նկատենք, որ Վլ. Թուրաբյանը եղել է ազգային անվտանգության նախկին աշխատակից:
Ռուզան ՄԻՆԱՍՅԱՆ
