Արմավիրի քաղաքային գրադարանը վերջերս է վերանորոգվել պետական միջոցներով: Այնտեղ պահվում է 110 737 կտոր գրականություն:
«Եթե ընթերցողին չենք կարողանում տրամադրել նորագույն ժամանակաշրջանի որեւէ գիրք, ապա նա հնարավորություն ունի օգտվել մեր անվճար էլեկտրոնային գրադարանից»,- ասում է գրադարանի տնօրեն Աիդա Ղազարյանը: Նա տեղեկացրեց, որ գրադարանն 2000թ. սկսած՝ համալրվում է նոր գրականությամբ, ստանում նաեւ ուսումնական ձեռնարկներ եւ բառարաններ: Արմավիրի գրադարանը համագործակցում է Երեւանի ազգային գրադարանի, Ավետիք Իսահակյանի եւ Խնկո-Ապոր անվան գրադարանների, ամերիկյան դեսպանատան ռեսուրս կենտրոնի հետ: Վերանորոգումից հետո գրադարանին կից գրախանութ է բացվել: Գրադարանի տնօրենը նշեց, որ ընթերցողների պահանջները մշտապես հաշվի են առնվում, հենց այդ պատճառով էլ ակտիվ գործում է էլեկտրոնային գրադարանը, սակայն նա համամիտ չէ, որ գիրքը այժմ ավելի քիչ է պահանջված. «Տպագիր գրքին փոխարինող չկա, ամեն դեպքում՝ ուզում եմ գիրք կարդալիս գրքի մեջ էջանշան թողնել, զգալ գիրքը»:
ԱՆԻ ՄԿՐՏՉՅԱՆ
«Առավոտ» օրաթերթ
