Տարվա սկզբին ներդրված բժշկական ապահովագրության փաթեթը, որից չեն կարող օգտվել ասենք՝ հավաքարարները, պոլիկլինիկայի բժիշկները եւ եւս մարդկանց որոշ խմբեր, դժգոհությունների ալիք է բարձրացրել: Այսօր
Aravot.am-ը ՀՀ Ազգային ժողովի առողջապահության, մայրության եւ մանկության հարցերի մշտական հանձնաժողովի նախագահ Արա Բաբլոյանից հետաքրքրվեց, թե որքանո՞վ է արդարացի, որ նրանք չեն ընդգրկվում: Պարոն Բաբլոյանն ի պատասխան մեր հարցի՝ ասաց. «Արդարացի չէ: Դա կապված է հնարավորությունների հետ: Այն բժշկական հաստատությունը, որտեղ ես աշխատում եմ եւ գիտական ղեկավար եմ, սկսած հավաքարարից մինչեւ պրոֆեսոր ունեն մի մակարդակի ապահովագրություն: Դա մոտեցում է, որը ապագայում պետք է լինի բոլորիս համար: Ուրիշ բան, որ սոցիալական փաթեթի հնարավորությունը սահմանափակ է, պետք է ընտրվեր մարդկանց ինչ– որ մի քանակ: Ես վստահ եմ՝ գալիք տարի, արդեն դպրոցները, որոնք կշարունակեն լինել այդ փաթեթի մեջ, կընդգրկվեն այն աշխատակիցները, որոնք այս տարի չեն ընդգրկվել»:
Արա Բաբլոյանը «Slaq» մամուլի ակումբում հրավիրված ասուլիսում խոստովանեց, որ սոցիալական փաթեթի ներկայիս ընդգրկվածությունը որոշ թերություններ ունի, սական պատգամավորը նաեւ վստահեցրեց, որ սա արդեն պրոգրեսիվ քայլ է, եւ այն կամաց-կամաց կզարգանա:
Կարդացեք նաև
Նշենք, որ սոցիալական փաթեթը նախատեսված է քաղաքացիական եւ պետական ծառայողների, կրթության, մշակույթի եւ սոցիալական պաշտպանության ոլորտների մասնագիտական պաշտոններ զբաղեցնողների համար: Փաթեթը հնարավորություն է տալիս 120 հազար անձի օգտվել մատչելի բուժծառայությունից, մինչեւ 3 մլն 800 հազար դրամանոց սրտի վիրահատությունից:
Լրագրողների այն հարցին ի պատասխան, որ ուսուցիչների շրջանում արդեն դժգոհություն կա, որ նրանց ստիպում են կոնկրետ ապահովագրական ընկերություն ընտրել, Արա Բաբլոյանը վերհիշեց մամուլում հրապարակված այն մեղադրանքը, թե պարոն Բաբլոյանը ճնշում է գործադրում մարզպետների վրա, որպեսզի վերջիններս էլ ստիպեն իրենց ենթականերին ընտրել Բաբլոյանի հիմնած ապահովագրական ընկերությունը. «Միանգամից ասեմ, որ 97 թվին ես ստեղծել եմ ապահովագրական ընկերություն եւ այդ ժամանակ ես արդեն նախարար չէի եւ դեռ պատգամավոր էլ չէի: Այն միակն է Հայաստանում, որ ունի 41 բաժնետեր, այսինքն՝ ռեալ բաժնետիրական ընկերություն է: Ստեղծել եմ եւ որպես գաղափարախոսություն գտել եմ, որ դա անհրաժեշտ է եւ պայքարել եմ, որ զարգանա: Լինելով պատգամավոր՝ ես աբսալյուտնը չեմ զբաղվում նրա կառավարմամբ եւ նույնիսկ բաժնետեր չեմ հանդիսանում: Ոչ մեկը իրավունք չունի ճնշի մարզպետին, ոչ էլ մարզպետը իրավունք ունի ճնշել որեէ մեկին, կամ տնօրենը՝ ուսուցչին: Ամեն մարդ պետք է իր իրավունքն իմանա, եւ ինքը պետք է ընտրի իր ապահովագրական ընկերությունը: Շեղումներ կլինեն՝ առաջին տարին է»:
Նելլի ԲԱԲԱՅԱՆ
