Հրազդանի ընտրություններին մի միջադեպ եղավ. ընտրողներից մեկը՝ սոցիալապես անապահով մի կին, ընտրատեղամասում պահանջում էր, որ ընտրակաշառքները արդար բաշխվեն: Նա բողոքում էր, որ հարեւանին տվել են, իրեն՝ ոչ, թեւեւ երկու անչափահաս երեխա է պահում: Այս առնչությամբ այսօր Aravot.am-ը ոստիկանության իրավաբանական վարչության պետ Թաթուլ Պետրոսյանից հետաքրքրվեց, ինչո՞ւ չարձագանքեցիք այդ դեպքին: Մինչ այդ պարոն Հակոբյանը ազատ, արդար ընտրությունների թեմայով համաժողովի ժամանակ վստահեցնում էր, որ եթե լինում է ընտրակաշառքների հետ կապված հայտարարություն, շատ օպերատիվ եւ արագ արձագանքում են: Պարոն Պետրոսյանը պատասխանեց. «Ես համոզված եմ, որ ոստիկանությունը արձագանքել է, որովհետեւ յուրաքանչյուր նման դեպք դիտում ենք որպես հանցագործության մասին հայտարարություն եւ քրեական դատավարության օրենսդրության շրջանակում քննության ենք առնում: Այդ դեպքը եւս քննության առարկա է դարձել»:
Ըստ ոստիկանի, տիկնոջ հաղորդած նյութերը ուսումնասիրվել են, քննության են ենթարկվել եւ նման դեպք չի արձանագրվել: Մեր հարցին՝ այսինքն կե՞ղծ հայտարարություն էր արել՝ Թաթուլ Պետրոսյանը պատասխանեց. «Քննությամբ պարզվել էր ամբողջը: Նա հայտարարություն պաշտոնապես չէր տվել, ես հիմա մանրամասները չեմ հիշում, բայց ներկայացել էր, նման արտահայտություն էր արել, որը քննությամբ չի պարզվել»:
Հռիփսիմե ՋԵԲԵՋՅԱՆ
Կարդացեք նաև
