«Տեսակետ» ակումբում այսօր կազմակերպված ասուլիսին խոհարարական տուրիզմի մասին խոսեցին «Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանն ու «Ռումեա» գայթակղիչ ճանապարհորդությունների ակումբի գլխավոր տնօրեն Ռուբեն Գրիգորյանը:
Պարոն Մամուլյանը իր խոսքում նշեց, որ խոհարարական տուրիզմը ձեւավորվել է վերջին տարիներին, եւ այն մեծ դեր ունի Հայաստանի տուրիզմի զարգացման մեջ. «Բոլորս էլ, երբ գնում ենք ուրիշ երկիր, առաջին հերթին ուշադրություն ենք դարձնում խոհանոցին: Դա ամենաուշն է մոռացվում»:
Ռուբեն Գրիգորյանը փաստում է, որ Հայաստանում հաճախ չգիտենք` ինչ պիտի հրամցնենք զբոսաշրջիկներին իրենց այցի ընթացքում: Մամուլյանն էլ տեղեկացրեց, որ նրանց առաջարկվում է ազգային խոհանոցից ամեն ինչ` ապուրներից մինչեւ աղանդեր: Եվ որպեսզի զբոսաշրջիկները ծանոթանան մեր ավանդական ուտեստներին, «Հայ խոհարարական ավանդույթների զարգացման և պահպանման» հ/կ-ն կանցկացնի ցուցահանդես-փառատոներ: Առաջինը նախատեսված է հունիսի 12-ին` «Տոնածիսակատարական խոհանոց» անվանմամբ: Մասնակցության հրավերներ ուղարկել են տարբեր երկրներ, ինչպես նաեւ Հայաստանում ապրող ազգային փոքրամասնություններին:
«Թոնրատոն», Տոլմայի, Խորովածի ու Գինու փառատոներ՝ սրանք էլ առաջիկայում կազմակերպվելիք մյուս միջոցառումներն են:
Կարդացեք նաև
Ըստ Ռուբեն Գրիգորյանի, մենք ունենք իրադարձությունների կազմակերպման ու անցկացման ժամկետների խնդիր, իսկ եթե դրանք հստակ լինեն, շատ հնարավոր է, որ զբոսաշրջիկները հատուկ դրա համար այցելեն Հայաստան:
Արամ ԱՐԱՐԱՏՅԱՆ
