Օգոստոսի 20-ի երեկոյան, ժամը 19-անց 30-ի սահմաներում Նոյեմբերյան քաղաքում մոտ 20 րոպե տեւողությամբ տեղատարափ անձրեւ տեղաց, որն ուղեկցվեց կարկուտով: Սելավաջրերը հեղեղել էին Նոյեմբերյանի փողոցները, լցվել քաղաքի կենտրոնում գտնվող քաղաքային մշակույթի տան շենքի առաջին հարկ: Մշակույթի տան նախասրահը, առաջին հարկում գտնվող «Աջակցություն Նոյեմբերյանին» ՀԿ գրասենյակն ամբողջությամբ լցված են ցեխաջրերով, փողոցի տարատեսակ աղբով, պլաստմասսե շշերով:
«Աջակցություն Նոյեմբերյանին» ՀԿ նախագահ Հասմիկ Ազիբեկյանը կազմակերպության գրասենյակից մաքրելով ցեխաջուրն ու կեղտը` դժգոհում էր, որ արդեն 30 տարի նույն վիճակն է, իշխանությունները, քաղաքապետերը փոխվում են, սակայն իրավիճակը չի փոխվում: Քաղաքի մշակույթի տունը փողոցի սելավաջրերից ապահովագրելու համար հարկավոր է ընդամենը մի քանի քար շարել, սակայն դա այդպես էլ չի արվում:
Նոյեմբերյանի մշակութի տան տնօրեն Կարինե Ազիբեկյանը պատահարի կապակցությամբ զանգահարել էր փրկարար ծառայություն: Սակայն հեղեղից մեկուկես ժամ անց ոչ փրկարար ծառայությունից, ոչ էլ Նոյեմբերյանի քաղաքապետարանից մշակույթի տուն մարդ չէր ժամանել: Ի դեպ, մշակույթի տունը նաեւ ընտրական տեղամաս է, ուր սեպտեմբերի 23-ին նոյեմբերյանցիները քաղաքապետ եւ համայնքի ավագանի են ընտրելու: Նշենք, որ Նոյեմբերյանի քաղաքապետարանը մշակույթի տնից գտնվում է 100, իսկ փրկարար ծառայությունը` մոտ 500 մ հեռավորության վրա:
Կարդացեք նաև
Ոսկան ՍԱՐԳՍՅԱՆ
