«Լոռու մարզում ոչ միայն աշխատատեղերի, այլև որակյալ մասնագետների պակաս ունենք»:
Այդ մասին Դաշնային Գերմանիայի Բունդեսթագի փոխնախագահ դոկտոր Վոլֆգանգ Թիրզեի գլխավորած պատվիրակության` Լոռի կատարած այցի ժամանակ ասաց մարզպետ Արթուր Նալբանդյանը:
Մարզպետը նշեց, որ կադրերի պակասը առավելապես վերաբերում է Վանաձորի քիմիական արդյունաբերությանը:
Կարդացեք նաև
«Անհրաժեշտություն է առաջանում հրավիրել անգամ տարեց մասնագետների: 20 տարիների անջրպետը սահուն սերնդափոխության խնդիր է առաջացրել»:
Ճանաչողական այցը նպատակ ուներ վերհանել մարզի արտադրական պոտենցիալը: Անդրադարձ կատարվեց նաեւ մարզում առկա հիմնախնդիրներին:
Խոսելով հիմնախնդիրներից` Արթուր Նալբանդյանը նշեց նաեւ, որ վերջին տարիներին մարզն ունի բնապահպանական լուրջ խնդիրներ:
«Որտեղ կա արդյունաբերություն, այնտեղ կան նաեւ բնապահպանական լուրջ խնդիրներ: Մեր գործընկերները մեծ ուշադրություն են դարձնում դրանց, այդ թվում նաեւ Վանաձորի հետ կապված աղբավայրի խնդիրներին»:
Այնուամենայնիվ, մարզպետի խոսքերով, առկա խնդիրներին զուգընթաց` մարզում իրականացվում են բարեփոխումներ, այդ թվում` գյուղատնտեսության ոլորտում:
«Քիմգործարանում արտադրվում է արհեստական սուտակ, առաջիկայում կարտադրվի նաև ազոտական պարարտանյութ, որը կբավարարի գյուղատնտեսության ոլորտում առկա պահանջարկի 80 տոկոսը»:
Անուշ ԲՈՒԼՂԱԴԱՐՅԱՆ
