1992թ. ՄԱԿ-ը դեկտեմբերի 3-ը հռչակել է հաշմանդամների միջազգային օր: Հայաստանը հաշմանդամների իրավունքների կոնվենցիային միացել է 2006թ. դեկտեմբերին:
Այս տարվա դեկտեմբերի 3-ին ՀՀ մշակույթի նախարարության աջակցությամբ «Արամ Խաչատրյան» համերգասրահում կանցկացվի «Լույս անսահման…» խորագրով համերգ: Այն նվիրված է լինելու Հաշմանդամների միջազգային օրվան: Ելույթ է ունենալու հաշմանդամների «Փարոս» կամերային երգչախումբը:
Ալ. Սպենդիարյանի անվան օպերայի եւ բալետի ազգային ակադեմիական թատրոնի երաժշտական ղեկավար եւ դիրիժոր Կարեն Դուրգարյանը լրագրողների հետ հանդիպման ժամանակ նշեց, որ ցանկություն չկա այս համերգով անել մի սենսացիոն բան. «Մեզ համար մեծ պատիվ է, որ հնարավորություն ունենք աշխատել նման տաղանդավոր երիտասարդների հետ: Նրանք մեծ ապագա ունեն եւ կարող են զարդարել ցանկացած բեմ: Չեմ ցանկանում ընդգծել, որ նրանք ինչ -որ խնդիրներ ունեն: Մենք ուզում ենք ասել, որ մեր կոլեգաները, ովքեր ունեն խնդիրներ, գտնվում են բարձր մակարդակում»:
Երեւանի Կոմիտասի անվան պետական կոնսերվատորիայի պրոֆեսոր Ռաֆայել Ակոբյանցն ասաց, որ առաջին անգամն է անցկացվում նման մասշտաբի համերգ` նվիրված Հաշմանդամների միջազգային օրվան:
«Փարոս» կամերային երգչախմբի գեղարվեստական ղեկավար եւ խմբավար Րաֆֆի Միքայելյանը տեղեկացրեց, որ «Լույս անսահման…» խորագիրն ունեցող համերգի ընթացքում կատարելու են Ա. Վիվալդիի «Գլորիա» ստեղծագործությունը, իսկ դաշնակահար Լեւոն Կարապետյանն էլ նվագելու է Բեթհովենի թիվ 3 կոնցերտը:
Արամ ԱՐԱՐԱՏՅԱՆ
