Վարչական դատարանը՝ դատավոր Աղասի Դարբինյանի նախագահությամբ քննում է «ՀՀ Եհովայի վկաների քրիստոնեական կրոնական կազմակերպության» հայցն ընդդեմ ՀՀ պետեկամուտների կոմիտեի Միջազգային ճանապարհային փոխադրումների տարածաշրջանային մաքսատան:
Կազմակերպությունը պահանջում է պատասխանողից ամբողջությամբ վերացնել վարչական ակտը, պարտավորեցնել նվիրատվության ծանուցագրով ներկայացված արժեքներն ընդունել, վարչական մարմնի կողմից ընտրված մեթոդն ու սահմանված արժեքները ոչ իրավաչափ ճանաչել և պարտավորեցնել փոխհատուցել դրա հետևանքով պատճառված վնասը:
Ինչպես «Փաստինֆո»-ի թղթակցի հետ զրույցում պարզաբանեց դիմող կողմի ներկայացուցիչ Լյովա Մարգարյանը, հայցադիմումն առնչվում է իրենց կողմից Հայաստան ներկրվող հոգևոր գրականության մաքսազերծման գործընթացին. կողմի գնահատմամբ, ապրանքը կամայականորեն է գնահատվել՝ պատճառաբանությամբ, թե Հայաստանում նմանատիպ ապրանքների գները բարձր են, մինչդեռ ըստ հայցվորի ներկայացուցչի, Հայաստանում նմանատիպ ապրանքներ չկան:
