Կովկասի ինստիտուտի տնօրեն Ալեքսանդր Իսկանդարյանի համոզմամբ` նախագահի թեկնածու Պարույր Հայրիկյանի վրա կատարված մահափորձը կատարվել է ոչ պրոֆեսիոնալ ձեւով, ոչ պրոֆեսիոնալի ձեռքով եւ ձեռնտու չէ նախագահի այլ թեկնածուներին կամ քաղաքական այն ուժերին, որոնք չեն մասնակցում ընտրապայքարին:
Նրա խոսքով` թեկնածուի վրա կատարված մահափորձը էական ազդեցություն չի ունենա ընտրությունների վերջնական արդյունքների վրա, սակայն կփոխի ընտրությունների ընթացքը:
ԱՊՀ երկրների ինստիտուտի հայկական մասնաճյուղի տնօրեն Ալեքսանդր Մարկարովը չի հավատում, որ Հայրիկյանի մահափորձը արտաքին ուժերի պատվերով է կատարվել:
«Մի բան հաստատ է` նրանք, ովքեր ցանկանում էին խախտել երկրի կայունությունը եւ ընտրությունների խաղաղ ընթացքը, իրենց նպատակին չհասան»,- այսօր «Նովոստի» լրատվական սրահում նշեց Ա. Մարկարովը` համոզմունք հայտնելով, որ Պարույր Հայրիկյանը չի դիմի Սահմանադրական դատարան՝ ընտրությունները հետաձգելու համար:
Կարդացեք նաև
Մոսկվայից հեռուստակամուրջի միջոցով կապ հաստատած
Սևծովյան – Կասպյան տարածաշրջանի քաղաքական և սոցիալական հետազոտությունների ինստիտուտի գիտաշխատող Անդրեյ Արեշեւի խոսքով` ընդհանրապես լուրջ չի կարելի վերաբերվել այն վարկածին, որ «Մոսկվայի ձեռքով» է կատարվել մահափորձը:
Կենտրոնական Ասիայի, Կովկասի և Ուրալ–Պովոլժիեի ուսումնասիրության կենտրոնի աշխատանքային խմբի համակարգող Ալեքսանդր Սկակովը իր միակարծությունը հայտնեց այն հրացում, որ նախագահի թեկնածուի դեմ կատարված մահափորձը չի կարելի վերագրել իշխանություններին: Ըստ նրա` Սերժ Սարգսյանը նախագահի հարմար թեկնածու է, եւ Ռուսաստանն ու ԱՄՆ-ն որեւէ կերպ երբեւէ անհամաձայնություն չեն հայտնել նրա թեկնածության հետ կապված:
Կովկասի ինստիտուտի տնօրեն Ալեքսանդր Իսկանդարյանի դիտարկմամբ` նույնիսկ հետաքննությունը չի տա մահափորձի հետ կապված բոլոր հարցերի պատասխանները:
«Ոչ ոք չի հավատա հետաքննության արդյունքներին, նույնիսկ հետաքննությունից հետո էլ ամեն մեկը կփորձի հավատարիմ մնալ իր առաջ քաշած վարկածին»:
Աշոտ ԱԹԱՅԱՆ
