«Ժողովրդավարական հայրենիք» կուսակցության հեռացված փոխնախագահ Ղուկաս Մեհրաբյանը կուսակցության նախագահ Պետրոս Մակեյանին մեղադրում է փողերի լվացման մեջ:
Այսօր «Փաստարկ» ակումբում պարոն Մեհրաբյանը ներկայացրեց նախապատմությունը: Ըստ նրա, կուսակցության գրասենյակը 2006-ին սոցապ հիմնադրամին է հանձնվել վարձակալության ու 2006-2009-ը ընկած ժամանակահատվածում, Մակեյանը վարձակալության դիմաց ստացել է 21,5 միլիոն դրամ. «Ասում ենք՝ լավ Պետրոս, բացատրիր, այդ գումարներն ինչ են եղել, ոչ ոք տեղյակ չէ, ոնց է ծախսվել, ինչ է արվել: Ու Մակեյանը սկսեց մեզ համարել Լեւոն Զուրաբյանի կողմից ուղղորդված: Բայց 2006-ին ոչ Զուրաբյան կար, ոչ ՀԱԿ կար: Մենք գումարի ծախսման հաշվետվություն ենք պահանջել, ասում է՝ ուզում եք կազմաքանդեք կուսակցությունը»:
Նա ասաց նաեւ, որ վերջին երեք տարիներին կուսակցությունը համագումար չի հրավիրել. «Մենք ասում ենք, ոչ մի բան չենք ուզում, մենակ պատասխանիր՝ ինչ եղավ այս գրասենյակի հետ: Սկզբում նախաբան է գրում, քֆուրքյաֆարներ է տալիս, Քոչարյանից սկսած, ասում է՝ ընդդիմադիր տառապանքների մեջ ենք, հալածված, դրա համար են խլել գրասենյակը: Բայց իրականում գործարքի մեջ է մտել Վազգեն Խաչիկյանի հետ, գրասենյակը վարձակալության է տվել ու գերշահույթներ ստացել»:
Արփինե ՍԻՄՈՆՅԱՆ
