Ինչպես հայտնի է, 2002թ. այս օրը «Ա1+» հեռուստաընկերությունը զրկվեց եթերից: Այս կապակցությամբ այսօր Մամուլի ազգային ակումբում «Ա1+»-ի տնօրեն Մեսրոպ Մովսեսյանն ասաց, որ նախորդ տարիները բավական դժվար են անցել, իսկ դժվարությունները մինչ օրս էլ շարունակվում են. «Հիմնական խնդիրն այն պիտակն էր, որը տխրահռչակ Ռոբերտ Քոչարյանի շնորհիվ կախվեց «Ա1+»-ի դռանը` որպես «երկրի թշնամի», «երկիրը քանդող» եւ «ապատեղեկատվություն տարածող» լրատվամիջոց: Հայաստանը դաժան տարիներ ապրեց Ռոբերտ Քոչարյանի շնորհիվ, ինչը կկոչեի պայքար հանուն սեփական անձի եւ հարստության պահպանման: Պատճառը միակն էր` նա պետք է իրեն ենթարկեցներ ամբողջ մամուլը: Նա առաջիններից մեկն էր, ով հասկացավ, թե ինչ է նշանակում ազատ մամուլ եւ ինչ է նշանակում եթեր թողնել ազատ մամուլը՝ որպես 4-րդ իշխանություն»:
Մեսրոպ Մովսեսյանի դիտարկմամբ. «Ռոբերտ Քոչարյանի կամքը կատարողները շատացան եւ մեծ բանակով սկսեցին «Ա1+»-ի դեմ ելույթներ ունենալ եւ դաշտը մեզանից մաքրելու պահանջներ ներկայացնել, ինչի արձագանքն էլ եղավ տխրահռչակ հանձնաժողովի նիստը, որտեղ մենք ամենացածր վարկանիշով գնահատվեցինք»:
Բանախոսը փաստեց, որ մամուլն իսկապես իշխանություն է եւ պարտավոր է կանգնած լինել ժողովրդի կողքին:
Պարոն Մովսեսյանի խոսքով. «Ա1+»-ը մնացել է ինչպիսին կա, եւ ես ուրախ եմ դրա համար: Ես հպարտ եմ, որ «Ա1+» -ի կոլեկտիվի հիմնական մասը շարունակում է աշխատել, չնայած շատ դժվարություններին` ֆինանսական, տեխնիկական, կադրային: Ոչ բոլոր լրագրողներն են ցանկանում աշխատել «տխրահռչակ» «Ա1+»-ում, իսկ ցանկացողները, շատ հաճախ փորձաշրջան անցնելով, չեն հասկանում «Ա1+»-ի դիրքը, այն է ` լինել միշտ ժողովրդի հետ, կատարել միայն ժողովրդի ցանկությունը, պաշտպանել ժողովրդին գիշատիչներից»:
Կարդացեք նաև
Հիշեցնենք, որ 2012թ.-ից «Ա1+»-ը լրատվական-վերլուծական հաղորդում ունի «ԱրմՆյուզ» հեռուստաընկերության եթերում
«Ա1+»-ի` եթեր վերադառնալու կապակցությամբ Aravot.am-ի հարցմանն ի պատասխան՝ ՀՌԱՀ-ը նշել էր, որ «Ա1+»-ի եւ «ԱրմՆյուզի» համագործակցությունը չի հակասում ՀՀ օրենսդրությանը:
Լուիզա ՍՈՒՔԻԱՍՅԱՆ
