Քիչ առաջ Գյումրու «ԳԱԼԱ» հեռուստաընկերության օպերատոր Տիգրան Գասաբյանը ֆեյսբուքյան «Լեննագանցիք» խմբում մի լուսանկար էր տեղադրել, որտեղ պատկերված էր, թե ինչպես են անձրևի տակ ասֆալտապատում Գյումրու կենտրոնական փողոցներից մեկը:
Օպերատորը նշել էր. «Ինչ որ տեսել են աչքերս. կրկին անձրև ու ասֆալտապատում»: Օգտատերերից մեկն էլ կատակով արձագանքել էր. «Ավանդույթները շարունակվում են, երևի այս վերջին շաբաթվա մեջ փորձի փոխանակում են կատարել, խոստացավ չէ՞, թե կարող ենք գանք, սովորեցնենք»: Օգտատերը, այսպես գրելով, ի նկատի ունի Գյումրու նախկին քաղաքապետ Վարդան Ղուկասյանին, ով մոտ մեկ ամիս առաջ «ՑԱՅԳ» հեռուստաընկերությամբ քննադատեց ներկայիս քաղաքապետի կատարած ասֆալտապատումը` ծաղրանքով իր օգնությունը առաջարկելով:
Ինչևէ, ի նկատի ունենալով, որ սա առաջին դեպքը չէ, երբ Գյումրու փողոցները ասֆալտապատվում են անձրևի տակ (մենք նման փաստեր ֆիքսել ենք), նախևառաջ փորձեցինք պարզաբանումներ ստանալ Շիրակի մարզպետարանի ճանապարհաշինության և տրանսպորտի բաժնի պետ Խաչատուր Խնձրցյանից:
Մեզ մի պահ թվաց, թե այդ փողոցը ասֆալտապատվում է կառավարության` Գյումրուն հատկացրած 300 միլիոն դրամի շրջանակում, որը նպատակ ունի տեսքի բերել մշակութային մայրաքաղաք հռչակված ու հյուրերի սպասող քաղաքի ավերակ փողոցները: Սակայն մարզպետարանի պաշտոնյան տեղեկացրեց, որ այդ գումարը ստանալու համար դեռ պայմանագրեր են կնքում կառավարության հետ, և նախատեսված գումարով կասֆալտապատվեն միայն Գյումրու հրապարակը` հարակից 4 փողոցներով, ինչպես նաև Շիրակացի փողոցը, իսկ մեր նշած ասֆալտապատումը իրականացվում է համայնքի բյուջեով:
Կարդացեք նաև
Մենք կապ հաստատեցինք նաև Գյումրու քաղաքապետարանի կոմունալ բաժնի պետ Կնյազ Մանասյանի հետ` հետաքրքվելով, թե ինչո՞ւ են անձրևի տակ ասֆլատ անում: Պաշտոնյան պարզաբանեց հետևյալը. « Նախ էդ անձրևը էն անձրևը չէր, որ դադարեցնեին աշխատանքները, բացի այդ, եթե ֆիքսում եք այդ կադրերը, չե՞ք տեսնում, որ գազի բալոնը բերեցին, այրիչը` (գառելկան), իջեցրեցին, չորացրեցին, նոր լցրեցին: Ես ձեզ վստահեցնում եմ, որ 11 պաշտոնատար անձ հսկիչ է կարգված ամեն մի բրիգադի գլխին: 21 ավագանու անդամ ունենք, որից մեկը կին է, այդ կնոջը չհաշված, մնացածները հանձնաժողովի կազմում են, դե հաշվեք . 5 ավագանու անդամ, քաղաքապետի մեկ խորհրդական , կոմունալ բաժնից մեկ գլխավոր մասնագետ հսկում են ամեն մի բրիգադին: Չհաշված քաղաքապետը, ես ու քաղաքապետի տեղակալը, ովքեր ամեն տեղ լինում են, ուսումնասիրում են ամեն մի բրիգադի կատարած աշխատանքը, այնպես որ ասֆալտապատումը խիստ ձևով է հսկվում, և անորակ լինելու մասին խոսք անգամ չի կարող լինել»:
Նունե ԱՐԵՎՇԱՏՅԱՆ
