«Ես քաղաքապետարանի աշխատակիցներին առաջարկում եմ գոնե մեկ օր թող շրջեն սայլակներով, որ հասկանան, թե ինչ խնդիրներ կան Երևանում»,- այսօր «Տեսակետ» մամուլի ակումբում լրագրողների հետ հանդիպմանն այսպիսի կոչ արեց նախկինում հաշմանդամություն ունեցող քաղաքացի Հասմիկ Մուրադյանը: Նա պատմեց, որ ինքը ժամանակին զբոսավար էր աշխատում, հիմա էլ է ուզում աշխատել, սակայն բազում խոչընդոտների է հանդիպում: Կամ ուզում է հայերեն-ճապոներեն զրուցարան հրատարակել, այդ դեպքում էլ խնդիրներ կան:
Մյուս խնդիրը, որ առանձնացրեց Հասմիկը, տրանսպորտի խնդիրն է, որ չի կարողանում ինքնուրույն տեղաշարժվել, ստիպված է նստել տաքսի, ինչը այնքան էլ մատչելի չէ: Կամ փողոց անցնելուց են դժվարություններ առաջանում, շատ վարորդներ հաճախակի գալիս կտրում են իր ճանապարհը: Ըստ Հասմիկի՝ այն, որ դեղատների աստիճանները փայլեցված գրանիտից են, սա ևս խնդիր է առաջացնում՝ հնարավոր է սայթաքեն:
«Ունիսոն» ՀԿ գործադիր տնօրեն Արմեն Ալավերդյանն էլ վերոնշյալ խնդիրների շարքում հիշատակեց նաև այն, որ հասարակական նշանակություն ունեցող մշակութային օջախների մեծամասնությունը ևս հաշմանդամներին հարմարեցված չէ: Խնդիրների լուծման վերաբերյալ պարոն Ալավերդյանը նշեց պայքարի և պահանջատեր լինելու ուղին ու հավելեց. «Մենք չպետք է սպասենք, որ բարի քեռիները մի բան անեն մեր խնդիրների լուծման համար»:
Անդրադառնալով Երևանի ավագանու ընտրություններում հաշմանդամություն ունեցող անձնաց համար ընտրության համար բարենպաստ պայմանների ապահովման հարցին՝ պարոն Ալավերդյանը նշեց, որ ընտրատեղամասերի ընդամենը 6 տոկոսն է լրիվ հարմար հաշմանդամություն ունեցող ընտրողներին, 44 տոկոսը գրեթե հարմար են հաշմանդամություն ունեցող մարդկանց համար:
Կարդացեք նաև
Նա մասնավորապես ասաց. «Հերթական անգամ անտեսվեց խուլ ընտրողների իրազեկված լինելու իրավունքը: Որևէ քարոզչական նյութ, տեսահոլովակ զուգորդված չէր սուրդոթարգմանությամբ: Ինչ վերաբերում է ծրագրերին, ապա այս անգամ ծրագրերն ավելի կոնկրետ են, իսկ նախկինում լղոզված էին. հաշմանդամ, ազատամարտիկ, փախստական, բոլորին խառնում էին ընդհանուր ցանկի մեջ: Հիմա ավելի հստակ են ծրագրերը: Ծրագիր գրելը հեշտ է, բայց աչքս պիտի տեսնի: Տարիներով սպասել չենք պատրաստվում, պայքարելու ենք ամեն կերպ»:
Aravot.am-ի հարցին՝ կոնկրետ ո՞ր քաղաքական ուժի հետ են կապում իրենց խնդիրների լուծումը, պարոն Ալավերդյանը պատասխանեց. «Մենք համագործակցում ենք բոլոր ուժերի հետ: Մենք պահանջատեր ենք լինելու և անկախ նրանից, թե ով է լինելու հաղթող, մենք չենք ներելու և պահանջելու ենք, եթե խոստումները իրականություն չդառնան»:
Տաթև ՀԱՐՈՒԹՅՈՒՆՅԱՆ
