Էրեբունի վարչական շրջանում այսօր ՀԱԿ քաղաքապետի թեկնածու Վահագն Խաչատրյանն ասաց, որ նախընտրական քարոզարշավի ընթացքում թեեւ մի քիչ հոգնել են, բայց դրական լիցքեր են ստացել:
«Որովհետեւ դուք մեզ ավելի շուտ հասկացաք, քան քաղաքական կոչվող գործիչները, որոնց համար Երեւանը միայն աղբ հանող, աղբ տեղափոխող քաղաքապետի ընտրություններ են»,- բնակիչներին դիմեց քաղաքապետի թեկնածուն:
Պարոն Խաչատրյանը նկատեց, որ քարոզարշավի շրջանակներում հանդիպումների սակավաթիվ մասնակիցների ներկայությունը ոչինչ չի նշանակում. «Այստեղ կարող եք ասել՝ շատ եք, քիչ եք, հավատացեք՝ բավարար ենք»:
Նա նաեւ անդրադարձավ գործող ավագանու անդամներին, ասաց այնտեղ կան մշակույթի գործիչներ, որոնք եւ կան եւ չկան. «Իշխանությունը նրանց հոգեպես սպանել է: Ֆիզիկապես կան, բայց հոգեպես չկան»:
Կարդացեք նաև
Հետո ՀԱԿ քաղաքապետի թեկնածուն ասաց, որ Էրեբունի վարչական շրջանը պատմական նշանակություն ունի եւ պետք է որ իշխանությունների հատուկ ուշադրությանը արժանանար, մինչդեռ. «Ամենակեղտոտ շրջանն է, չոր, ամենաքիչ կանաչով շրջանն է՝ շրջապատված մի քանի վտանգավոր հանքավայրերով, եւ ոչ ոք ձեր մասին չի մտածում: Կարեւորն այստեղից փող են հանում: Ուզում ենք այս ամենը փոխել, սա գյուղական միջավայր է ավելի շատ հիշեցնում»:
Նրա խոսքերով, իշխանությունները չեն կարողանում կառավարել քաղաքը, եւ այն դարձրել են գյուղաքաղաք. «Մարդը, իր քաղաքային միջավայրը որեւէ արժեք չունեն: Այստեղ պետք է լինես չակերտավոր լավ տղա, թաղի տղա, նայող տղա, պպզող տղա, բայց քաղաքացի չպետք է լինես: Մենք մերժում ենք այս բաները, մեզ համար անընդունելի են»:
Պարոն Խաչատրյանը նաեւ հավելեց, որ չի ցանկանում միայն մռայլ գույներով ներկայացնել իրավիճակը. «Ինձ ասում են՝ ինչու պայծառ Երեւանի մասին չեք խոսում: Կարող եմ դրա մասին էլ խոսեմ, մեր թիմի պատկերացումներն էլ ներկայացնել, դրանք երազանքներ են, որոնք պետք է իրականություն դարձնել՝ քաղաքի զարգացում, քաղաքաշինություն, մաքուր, կանաչ քաղաք, նորմալ տրանսպորտ: Ինչպե՞ս պետք է անենք, դրա ձեւերն էլ գիտենք, եթե չիմանանք, կգնանք մի ուրիշ քաղաքում կսովորենք, մասնագետներ կկանչենք, կսովորենք: Դրա մեջ վատ բան չկա, բայց անճաշակ չենք լինի, ինչպես անում են՝ տոնածառներով, պլաստմասե խաղալիքներով»:
Պարոն Խաչատրյանն էլ հենց ամփոփեց Էրեբունիում բնակիչների հետ հանդիպումը, որից հետո ՀԱԿ համակիրներն ու ՀԱԿ գործիչները քայլերթ սկսեցին՝ «Տարոն հեռացիր, Վահագն քաղաքապետ» կոչերով:
Արփինե ՍԻՄՈՆՅԱՆ
Նորություն չէ, մի շրջան քաղաքապետի դիրքերում էիր և ինչ:
Արդյունքը ամբողջ Երևանով լիքը բենզալցակայան-բուտկաներ ( մարդ անգամ չգիտի, ինչպես կոչի այդ ահավոր չարաբաստիկ օբյեկտները )
Ամոթը մարդու համար է….. ու դեռ քննադատում է…. բոլորովին էլ կարևոր չի թե ում:
Կտեսնենք թե որքան ձայն կհավաքես ԱԶՆԻՎ ու ԱՆԿԱՇԱՌ նախկին քաղաքապետ