Երևանում այսօր անցկացվող ԵԽԽՎ մշտական հանձնաժողովի նիստին, որն անցկացվում է Նախարարների կոմիտեում Հայաստանի նախագահության շրջանակներում, 47 երկրների պատվիրակների շարքում էր Թուրքիայի պատվիրակության ղեկավար Նուրսունա Մեմեքանը: Նշենք, որ ադրբեջանցի պատվիրակները չեն ժամանել ՀՀ՝ մասնակցելու մշտական հանձնաժողովի նիստին:
Aravot.am-ը Ն. Մեմեքանի հետ զրույցում բարձրացրեց այն հարցը, թե ԼՂ հակամարտության խաղաղ կարգավորման խնդրի քննարկումների ժամանակ թուրք պատվիրակները միշտ ոչ չեզոք դիրքորոշում են ունենում` պաշտպանելով ադրբեջանական կողմի տեսակետները, ինչի պատճառով հաճախ Թուրքիան մեղադրվում է, որ խոչընդոտում է հակամարտության խաղաղ կարգավորմանը: Այս առիթով Ն. Մեմեքանը մեզ հետ զրույցում ասաց. «Թուրքիան չի ուզում խոչընդոտել հակամարտության խաղաղ կարգավորմանը, ընդհակառակը, Թուրքիան կողմ է հակամարտության խաղաղ կարգավորմանը: Թուրքիան հաճախ փորձում է ունենալ չեզոք դիրքորոշում հակամարտության հարցում, մենք փորձում ենք լավ հարաբերություններ հաստատել Հայաստանի հետ և ուզում, որ Հայաստանում տիրի խաղաղություն և կայունություն: Տարածաշրջանում խաղաղության և կայունության ապահովումը ևս մեզ համար կարևոր է, ինչպես նաև ՀՀ-ի և Ադրբեջանի համար: Ուստի մեր հնարավորությունների շրջանակներում կնպաստենք հակամարտության խաղաղ կարգավորմանը, ինչպիսի ենթատեքստում էլ լինի: Եթե մենք կարողանանք նպաստել հակամարտության խաղաղ կարգավորմանը, մենք դա կանենք»:
Տաթև ՀԱՐՈՒԹՅՈՒՆՅԱՆ
