«Գլխավոր հերսուհին անընդհատ փնտրտուքների մեջ է: Ֆիլմն իմ մանկության մասին էլ է նաեւ, քանզի ես էլ եմ եղել երազկոտ աղջնակ ու անցել այդ կարեւոր տարիքի առավելությունների եւ թերությունների միջով: Իմ ներքին հիշողություններն էին, որոնք երբեք այլեւս հետ չես բերի»,-այսօր «Ոսկե ծիրան» Երեւանի 10-րդ միջազգային կինոփառատոնում միջազգային խաղարկային մրցույթ/հայկական համայնապատկեր մրցույթ անվանակարգում ներկայացրած իր «Այդ ես չեմ» ֆիլմի մասին խոսեց ռեժիսոր Մարիա Սահակյանը:
Ֆիլմում 14-ամյա աղջկա՝ Եվրիդիկեի աշխարհն է. նա ապրում է հասունացման տարիքի առաջին հուզավառ զգացմունքները: Ֆիլմը տպավորիչ եւ գեղարվեստական գույներով ներկայացնում է այդ անձնական աշխարհը, որը պտտվում է ինտերնետային չաթի սենյակների եւ բջջային հեռախոսի տեսապատկերների շուրջը: Կինոնկարի յուրօրինակությունը պատկերների եւ պոեզիայի երազային աշխարհն է, որտեղ հայկական բնապատկերը եւս իր դերն ունի: Վերադառնում է մոր նախկին սիրեկանը՝ տեղիք տալով չնախատեսված հետեւանքների եւ զուգահեռների: Սահակյանի խոսքերով՝ ֆիլմը, կոչված է արտացոլելու սիրո տարբեր չափումները:
Անժելա ՇԱՀՈՒՄՅԱՆ
